प्रतिनिधी:
न्यायव्यवस्थेची ठाम आणि कठोर भूमिका अधोरेखित करणारा निर्णय देत पुणे येथील न्यायालयाने एका गंभीर गुन्ह्यातील आरोपीला दुय्यम आजीवन कारावासाची शिक्षा सुनावली आहे.
मिळालेल्या माहितीनुसार, २०२२ मधील या प्रकरणात मधुकर भेंडाळे (वय ३३, रा. पाहापळ, ता. मारेगाव) याने एका मुलीवर अत्याचार करून तिला शेतातील काटेरी झुडपात टाकून दिल्याचा आरोप होता. घटनेनंतर पीडित शुद्धीवर आल्यानंतर ही बाब उघडकीस आली. यानंतर नातेवाईकांनी मारेगाव पोलीस ठाण्यात तक्रार दाखल केली होती.
या प्रकरणाचा तपास उपविभागीय पोलीस अधिकारी संजय कुंजलवार यांनी केला. सरकारी पक्षाकडून नीती दवे यांनी प्रभावी युक्तिवाद केला, तर बचाव पक्षाकडून सिद्धार्थ लोड यांनी बाजू मांडली.
दोन्ही बाजूंचा युक्तिवाद ऐकून विशेष सत्र न्यायाधीश अभिजीत देशमुख (केळापूर) यांनी १६ एप्रिल रोजी निकाल देत आरोपीला कलम ३७६ व ३०७ अंतर्गत दोषी ठरवत दुय्यम आजीवन कारावासाची शिक्षा सुनावली. तसेच इतर कलमांअंतर्गत कठोर शिक्षा व दंडही ठोठावण्यात आला आहे.
न्यायालयाने आपल्या आदेशात सर्व शिक्षा एकाच वेळी भोगाव्या लागतील, तसेच पीडितेला ४० हजार रुपयांची भरपाई देण्याचे निर्देश दिले आहेत.
या निर्णयामुळे न्यायव्यवस्थेवरील विश्वास अधिक दृढ झाल्याची भावना नागरिकांमध्ये व्यक्त होत आहे.
