बार्शी (प्रतिनिधी) : ढोराळे (ता. बार्शी) येथे वैराग पोलीस ठाण्याच्या वतीने गाव शांतता बैठक पार पडली. या बैठकीस पोलीस निरीक्षक कुंदन गावडे प्रमुख उपस्थित होते.
यावेळी पीआय गावडे यांनी ग्रामस्थ व तरुणांना मार्गदर्शन करत, गावातील शांतता आणि सलोखा टिकवून ठेवण्याचे आवाहन केले. तरुणांनी दारू, गुटखा, तंबाखू यापासून दूर राहून स्वतःच्या आरोग्याची काळजी घ्यावी, तसेच गावात कोणत्याही प्रकारचा जातीय किंवा धार्मिक तणाव निर्माण होणार नाही याची खबरदारी घ्यावी, असे त्यांनी सांगितले.
महापुरुषांच्या जयंती व धार्मिक कार्यक्रम साजरे करताना सर्व समाजघटकांना विश्वासात घेऊन तसेच पोलीस परवानगी घेऊनच कार्यक्रम आयोजित करावेत, असेही त्यांनी स्पष्ट केले. गावात गुंडागर्दी किंवा दहशत निर्माण करणाऱ्या प्रवृत्तींना थारा दिला जाणार नाही, असा इशाराही त्यांनी दिला.
तसेच, गावातील कोणीही व्यक्ती कायद्याचे उल्लंघन केल्यास त्याच्यावर कठोर कायदेशीर कारवाई करण्यात येईल, असे स्पष्ट करत ग्रामस्थांनी गावात शांतता राखण्यासाठी सहकार्य करावे, असे आवाहन करण्यात आले.
या बैठकीस गाव कामगार पोलीस पाटील अतुल बनसोडे, कांता चौरे, जीवन काकडे, रावसाहेब काकडे, अमोल शिंदे, शिवाजी काकडे, बालाजी जाधव, निलेश इंगळे यांसह विविध समाजघटकातील नागरिक उपस्थित होते.
