पालम : तालुक्यातील मौजे बनवस शेतशिवारात एका अनोळखी तरुणाचा मृतदेह आढळून आल्याने परिसरात खळबळ उडाली आहे. याप्रकरणी पालम पोलीस ठाण्यात गुन्हा दाखल करण्यात आला असून, पोलिसांकडून मृताची ओळख पटविण्याचे प्रयत्न सुरू आहेत.
पोलीस सूत्रांकडून मिळालेल्या माहितीनुसार, 17 एप्रिल 2026 रोजी सकाळी सुमारे 7 वाजताच्या सुमारास ही घटना उघडकीस आली. संबंधित इसमाने स्वतःच्या ताब्यातील मोटारसायकल भरधाव वेगाने व निष्काळजीपणे चालविल्याने अपघात होऊन त्याचा मृत्यू झाल्याचा प्राथमिक अंदाज व्यक्त करण्यात आला आहे.
मृत व्यक्तीचे वय अंदाजे 25 ते 30 वर्षे असून, उंची सुमारे साडेपाच फूट आहे. रंग सावळा, चेहरा लांबट असून पोटावर बेंबीच्या वरच्या बाजूस तिळ असल्याचे आढळले आहे. त्याने काळी पॅन्ट, आकाशी रंगाचा “AX SHIVSAI Casual Wear” असा उल्लेख असलेला शर्ट, कॉटन कॅंडी बनियन व लाल रंगाचे अंडरवेअर परिधान केले होते.
या प्रकरणी पालम पोलीस ठाण्यात गु.र.नं. 181/2026 कलम 106(1) भारतीय न्याय संहितेनुसार गुन्हा नोंदविण्यात आला आहे.
तरी संबंधित मृत व्यक्तीची ओळख, नाव, गाव किंवा नातेवाईक याबाबत कोणास काही माहिती असल्यास त्यांनी तात्काळ पोलीस निरीक्षक शेषराव खटाणे (मो. 7972308090) किंवा पोलीस उपनिरीक्षक शिवकांत नागरगोजे (मो. 9075261127) यांच्याशी संपर्क साधावा, असे आवाहन पालम पोलिसांनी केले आहे.
