अक्राणी | प्रतिनिधी
अक्राणी तालुक्यातील बिलगाव येथील पत्रकार तथा समाजसेवक सुरतान सेल्या पावरा यांची भारतीय समाज सेवा संस्थेच्या महाराष्ट्र प्रदेश राज्य कार्यकारिणी अध्यक्षपदी निवड करण्यात आली आहे. 19 एप्रिल 2026 रोजी झालेल्या बैठकीत हा निर्णय एकमताने घेण्यात आला असून त्यांना तीन वर्षांसाठी ही जबाबदारी देण्यात आली आहे.
उत्तर प्रदेशातील गोंडा येथील केंद्रीय कार्यालयात झालेल्या बैठकीत राष्ट्रीय अध्यक्ष अनिल यादव यांनी त्यांच्या कार्याची दखल घेत निवडीची घोषणा केली. पत्राद्वारे त्यांना नियुक्ती देत त्यांच्या कार्याचा गौरव करण्यात आला.
सुरतान पावरा हे पावरा समाजातील एकमेव पत्रकार म्हणून ओळखले जात असून त्यांनी पत्रकारितेतून समाजसेवेची वाट निवडली आहे. अतिदुर्गम भागातील प्रश्नांना त्यांनी सातत्याने वाचा फोडत विविध सामाजिक उपक्रम राबवले आहेत.
नंदुरबार जिल्हाध्यक्ष म्हणून कार्यरत असताना त्यांनी भमाणा (डणावपाडा) येथे आदिवासी महिलांसाठी सौर ऊर्जा पाणी मोटर बसवून पाणी समस्या सोडवली. तसेच जीवन शाळेतील विद्यार्थ्यांना शालेय साहित्य वाटप, गरजू महिलांना पाणी वाहतुकीसाठी रोलर ड्रम उपलब्ध करून देणे, तसेच आगग्रस्त कुटुंबांना मदत अशा अनेक उपक्रमांतून त्यांनी आपली वेगळी ओळख निर्माण केली आहे.
याशिवाय महिला सक्षमीकरण, अंधश्रद्धा निर्मूलन, आरोग्य सुविधा आणि संविधान जागृती यासाठी त्यांनी सातत्याने काम केले आहे. “अतिदुर्गम भागातून येऊनही त्यांनी केलेले कार्य प्रेरणादायी आहे,” असा विश्वास राष्ट्रीय अध्यक्षांनी व्यक्त केला.
पावरा समाजातून पहिल्यांदाच एखाद्या व्यक्तीने राज्याध्यक्षपद गाठल्याने अक्राणी तालुक्यासह संपूर्ण नंदुरबार जिल्ह्यात त्यांच्यावर अभिनंदनाचा वर्षाव होत आहे.
