कन्नड | प्रतिनिधी
कन्नड तालुक्यातील दिव्यांग क्रिकेटपटू मोहसिन शेख यांची श्रीलंका दौर्‍यासाठी भारतीय संघात निवड झाल्याने परिसरात आनंदाचे वातावरण निर्माण झाले आहे. अत्यंत हलाखीच्या परिस्थितीतही क्रिकेटची आवड जोपासत त्यांनी ही उल्लेखनीय कामगिरी साध्य केली आहे.
घराचा उदरनिर्वाह करण्यासाठी पानटपरी चालवणारे मोहसिन शेख यांनी कन्नडच्या येस क्लबमधील प्रशिक्षक प्रविण कुलकर्णी व योगेश सर यांच्या मार्गदर्शनाखाली क्रिकेटचे धडे घेत आपली गुणवत्ता सिद्ध केली. यापूर्वी त्यांनी बांग्लादेशविरुद्धही भारतीय संघाचे प्रतिनिधित्व केले आहे.
कोलंबो येथे 1 ते 6 मे दरम्यान होणाऱ्या तीन टी-20 आणि एका आंतरराष्ट्रीय कसोटी मालिकेसाठी त्यांची निवड झाली आहे. दिव्यांग क्रिकेट कंट्रोल बोर्ड ऑफ इंडियाकडून प्राप्त पत्रानुसार ते महिन्याच्या अखेरीस कोलंबोला रवाना होणार आहेत.
त्यांच्या या निवडीबद्दल आमदार संजना जाधव, नगराध्यक्षा फरीन बेगम अब्दुल जावेद, नगरसेवक अब्दुल जावेद सेठ, एजाज खान पठाण, गणेश मोरे, अनिल शिरसाठ, विठ्ठल शिरसाठ, संजय भालेराव आदी मान्यवरांनी अभिनंदन करत पुढील वाटचालीसाठी शुभेच्छा दिल्या आहेत.
