पाथरी (प्रतिनिधी )
पाथरी तालुक्यातील जवळा झूठा ग्रामपंचायतीतील रिक्त सदस्य पदासाठी जाहीर झालेली पोटनिवडणूक अखेर बिनविरोध पार पडली. तहसीलदार श्री. शंकर एन. हांदेशवार यांच्या पुढाकारामुळे गावात सलोखा राखत निवडणूक प्रक्रिया टाळण्यात यश आले.
या पदासाठी जयश्री शिवाजी झुटे आणि प्रियंका शरद झुटे यांनी उमेदवारी अर्ज दाखल केले होते. मात्र एकाच जागेसाठी दोन उमेदवार असल्याने निवडणूक होण्याची शक्यता निर्माण झाली होती. गावातील एकोपा कायम ठेवण्यासाठी तहसीलदार हांदेशवार यांनी उमेदवार व ग्रामस्थांशी संवाद साधून बिनविरोध निवडीचे आवाहन केले.
तहसीलदारांच्या विनंतीला मान देत जयश्री शिवाजी झुटे यांनी माघारीच्या अंतिम दिवशी (दि. १७ एप्रिल) आपला अर्ज मागे घेतला. त्यामुळे प्रियंका शरद झुटे यांची ग्रामपंचायत सदस्य म्हणून बिनविरोध निवड निश्चित झाली.
या प्रक्रियेत निवडणूक निर्णय अधिकारी तथा विस्तार अधिकारी पंचायत श्री. गणेश रेवणवार, तसेच गावातील प्रतिष्ठित नागरिकांनी महत्त्वाची भूमिका बजावली. याशिवाय श्री. बी. ए. बोरकर, श्री. महेंद्र सोनवणे (कनिष्ठ सहाय्यक) आणि ग्राम महसूल अधिकारी श्री. सय्यद यांचेही सहकार्य लाभले.
बिनविरोध निवड झाल्यानंतर तहसीलदार श्री. शंकर एन. हांदेशवार यांनी प्रियंका शरद झुटे यांचे अभिनंदन करून त्यांच्या पुढील कार्यकाळासाठी शुभेच्छा दिल्या. गावात शांतता आणि एकोप्याचे वातावरण राखत घेतलेला हा निर्णय प्रेरणादायी ठरत आहे.
