वर्धा (प्रतिनिधी )
अंमली पदार्थांच्या विरोधात वर्धा पोलिसांनी धडक कारवाई करत गांजा विक्री करणाऱ्या आरोपीला रंगेहात अटक केली आहे. या कारवाईत सुमारे 1 लाख 34 हजार 775 रुपयांचा मुद्देमाल जप्त करण्यात आला आहे.
पोलीस अधीक्षक सौरभ कुमार अग्रवाल यांच्या आदेशानुसार जिल्ह्यात अंमली पदार्थांविरोधात विशेष मोहीम राबविण्यात येत आहे. त्यानुसार स्थानिक गुन्हे शाखेचे पथक 18 एप्रिल 2026 रोजी हिंगणघाट उपविभागात गस्त घालत असताना गोपनीय माहितीच्या आधारे समुद्रपूर पोलीस ठाण्याच्या हद्दीतील मौजा कोरी येथे छापा टाकण्यात आला.
या कारवाईदरम्यान कमलाकर चिंतामन वावधणे याला गांजा विक्री करताना रंगेहात पकडण्यात आले. त्याच्या ताब्यातून 2 किलो 151 ग्रॅम गांजा, वाहतुकीसाठी वापरण्यात आलेली पॅशन प्रो मोटारसायकल (क्र. MH 32 AM 1627) तसेच मोबाईल असा एकूण 1,34,775 रुपयांचा मुद्देमाल जप्त करण्यात आला.
याप्रकरणी आरोपी कमलाकर वावधणे तसेच त्याला गांजा पुरवठा करणारा शेख अलीम शेख रमजान (रा. आदर्श नगर, नागपूर) यांच्याविरुद्ध समुद्रपूर पोलीस ठाण्यात एनडीपीएस कायद्यान्वये गुन्हा दाखल करण्यात आला आहे.
ही कारवाई पोलीस अधीक्षक सौरभ कुमार अग्रवाल व अपर पोलीस अधीक्षक सदाशिव वाघमारे यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद चौधरी, उपनिरीक्षक प्रकाश लसुंते तसेच पथकातील कर्मचारी यांनी यशस्वीपणे पार पाडली.
