बोर व्याघ्र प्रकल्पात ‘निसर्गानुभव’ घेण्याची संधी; ४४ मचाणांवरून होणार वन्यप्राणी गणना

सेलू प्रतिनिधी –

वर्धा जिल्ह्यातील बोर व्याघ्र प्रकल्पात दरवर्षीप्रमाणे यंदाही बुद्ध पौर्णिमेच्या निमित्ताने ‘पाणस्थळावरील निसर्गानुभव कार्यक्रम–२०२६’ आयोजित करण्यात आला आहे. दि. १ मे २०२६ रोजी होणाऱ्या या उपक्रमातून वन्यजीव प्रेमींना मचाणावरून वन्यप्राण्यांचे निरीक्षण करण्याची अनोखी संधी उपलब्ध होणार आहे.

या वर्षी बफर आणि कोअर अशा दोन्ही क्षेत्रांतील एकूण पाच वनपरिक्षेत्रांमध्ये हा कार्यक्रम राबवण्यात येणार आहे. यामध्ये हिंगणी बफर, बांगडापूर बफर, न्यू बोर अभयारण्य (हिंगणी कोअर), बोरधरण कोअर आणि कवडस कोअर या क्षेत्रांचा समावेश आहे. या सर्व भागांतील एकूण ४४ मचाणांची निवड करण्यात आली आहे.

निवड झालेल्या सहभागी निसर्गप्रेमींना दि. १ मे रोजी दुपारी ३ वाजेपासून ते दि. २ मे रोजी सकाळी ८ वाजेपर्यंत मचाणावर बसून वन्यजीवांचे निरीक्षण आणि नोंदी करण्याची संधी मिळणार आहे. या उपक्रमात सहभागी होण्यासाठी किमान वय १८ वर्षे असणे आवश्यक आहे.

या कार्यक्रमासाठी अर्ज केवळ ऑनलाइन पद्धतीने स्वीकारले जाणार असून, www.penchtigerreserve.maharashtra.gov.in या संकेतस्थळावरील Google Form द्वारे नोंदणी करता येईल. अर्ज करण्याची मुदत दि. २० एप्रिल २०२६ दुपारी १२ वाजेपासून ते दि. २२ एप्रिल २०२६ दुपारी ३ वाजेपर्यंत आहे.

निवड प्रक्रिया ‘प्रथम येणाऱ्यास प्रथम प्राधान्य’ या तत्त्वावर होणार असून, मुदतीनंतर आलेल्या अर्जांचा विचार केला जाणार नाही. मागील वर्षी या उपक्रमाला मोठा प्रतिसाद लाभला होता. त्यामुळे इच्छुकांनी वेळेत नोंदणी करण्याचे आवाहन बोर व्याघ्र प्रकल्पाचे उपसंचालक मंगेश जी. ठेंगडी यांनी केले आहे.