शहादा, दि. २० (प्रतिनिधी)
शहादा नगरपालिकेच्या सर्वसाधारण सभेत शहराच्या सांस्कृतिक वैभवात भर घालणारा महत्त्वपूर्ण निर्णय घेण्यात आला असून, पाण्याच्या टाकीजवळील खेतिया रोडवरील चार रस्त्याला आता ‘संत शिरोमणी गुरु रोहिदास महाराज चौक’ असे नाव देण्यात येणार आहे. या प्रस्तावाला सभेत सर्वानुमते मंजुरी देण्यात आली.
दि. १७ एप्रिल रोजी पार पडलेल्या सभेत प्रभाग क्रमांक ६ च्या नगरसेविका सौ. भारती सुरेश चव्हाण यांनी हा नामकरणाचा प्रस्ताव मांडला होता. संत रोहिदास महाराजांच्या समतेच्या आणि मानवतेच्या विचारांचा वारसा जतन करण्यासाठी या चौकाला त्यांचे नाव देण्याची मागणी त्यांनी केली होती. सभेतील सर्व सदस्यांनी या प्रस्तावाला एकमुखाने पाठिंबा दिला.
नगरपालिकेचा हा निर्णय समाजात समता, बंधुता आणि मानवतेचा संदेश देणारा ठरला आहे. संत रोहिदास महाराजांच्या नावाने चौकाला अधिकृत ओळख मिळाल्यामुळे विविध स्तरांतून समाधान आणि आनंद व्यक्त होत आहे. विशेषतः तरुण पिढीसाठी त्यांच्या विचारांचा प्रेरणादायी वारसा जपला जाणार असल्याचे मत व्यक्त केले जात आहे.
या ठरावाबद्दल नगरसेविका सौ. भारती सुरेश चव्हाण यांनी आनंद व्यक्त करत नगराध्यक्ष अभिजीत पाटील, उपनगराध्यक्षा सौ. माधवीताई पाटील, मुख्याधिकारी साजिद पिंजारी तसेच सर्व नगरसेवक-नगरसेविकांचे आभार मानले.
शहराच्या मध्यवर्ती ठिकाणी असलेल्या या चौकाला नवीन नाव मिळाल्याने शहादा शहराच्या सामाजिक आणि सांस्कृतिक चळवळीला नवे बळ मिळणार असल्याची भावना नागरिकांकडून व्यक्त होत आहे.
