शहादा, दि. २० (का.प्र.)
संसदेत महिलांना ३३ टक्के आरक्षण देणाऱ्या ‘नारी शक्ती वंदन’ विधेयकाला विरोध केल्याच्या पार्श्वभूमीवर शहादा तालुक्यात शिवसेना महिला आघाडीच्या वतीने कन्साई येथे तीव्र निषेध आंदोलन करण्यात आले. या आंदोलनात विशेषतः आदिवासी समाजातील महिलांनी मोठ्या संख्येने सहभाग नोंदवत काँग्रेस व इंडी आघाडीच्या भूमिकेचा निषेध केला.
कन्साई (ता. शहादा) येथे झालेल्या या आंदोलनात महिलांनी आरोप केला की, महिलांना संसद व विधानसभेत हक्काचे प्रतिनिधित्व मिळवून देणाऱ्या या महत्त्वाच्या विधेयकाला विरोध करून काँग्रेस आघाडीने महिलांच्या प्रगतीला अडथळा निर्माण केला आहे. त्यामुळे महिलांना पुन्हा एकदा राजकीय हक्कांपासून वंचित राहावे लागेल, अशी भावना आंदोलनकर्त्यांनी व्यक्त केली.
यावेळी शिवसेनेच्या युवा कार्यकर्त्या कु. प्रियांका ठाकरे यांनी तीव्र शब्दांत प्रतिक्रिया देताना सांगितले की, “या विधेयकामुळे महिलांचे राजकीय प्रतिनिधित्व वाढले असते. मात्र, काँग्रेस आणि इंडी आघाडीच्या भूमिकेमुळे गरीब, आदिवासी, दलित व मागासवर्गीय महिलांना सत्तेच्या सर्वोच्च पातळीवर जाण्यापासून रोखले गेले आहे.”
आंदोलनादरम्यान “महिलांना हक्काचे आरक्षण मिळालेच पाहिजे”, “विधेयकाला विरोध करणाऱ्यांचा धिक्कार असो”, “नारी शक्तीचा अपमान सहन केला जाणार नाही” अशा जोरदार घोषणा देण्यात आल्या. या वेळी महिलांची मोठी उपस्थिती पाहायला मिळाली.
या आंदोलनात कु. प्रियांका ठाकरे, रिनाबाई ठाकरे, सुशीलाबाई पवार, कोमलाबाई पाडवी, रेखाबाई ठाकरे, गणाबाई सोनवणे, हिराबाई ठाकरे, उखडीबाई ठाकरे, आहलीबाई वळवी, तुशाबाई वळवी, सुमन रहासे, नियावंती मोरे, ओबिता ठाकरे, रीता ठाकरे यांच्यासह असंख्य महिला सहभागी झाल्या.
सदर आंदोलन यशस्वी करण्यासाठी शिवसेना शहादा तालुका प्रमुख मनलेश जायसवाल, ज्येष्ठ नेते डॉ. राजेंद्र पेंढारकर, लक्ष्मण पवार, गिना ठाकरे, गुलाब वळवी, रोहिदास वळवी, आत्माराम बर्डे, धनराज जायसवाल, जगदीश ठाकरे, संतोष पवार, जुमा पटले, सुदाम ठाकरे आदींनी परिश्रम घेतले.
या आंदोलनातून महिलांनी आपल्या हक्कांसाठी एकजूट असल्याचा ठाम संदेश दिला.
