भोई समाज वधू-वर परिचय पुस्तिकेचे अक्षय तृतीयेच्या मुहूर्तावर प्रकाशन

शहादा, दि. २० (प्रतिनिधी)

अक्षय तृतीयेच्या शुभ मुहूर्तावर येथील स्वर्गीय विपुल खेडकर सामाजिक व शैक्षणिक फाउंडेशन अंतर्गत कार्यरत अखिल भारतीय भोई समाज कल्याणकारी मंच, महाराष्ट्र राज्य यांच्या वतीने भोई समाजाच्या वधू-वर परिचय पुस्तिकेचे (PDF) प्रकाशन उत्साहात संपन्न झाले.

या कार्यक्रमात प्रा. महेंद्र खेडकर यांचे धाकटे बंधू तथा सेवानिवृत्त मुख्याध्यापक कृष्णा खेडकर यांच्या ‘जे. के. प्रॉपर्टीज’ या कार्यालयाचे उद्घाटनही मान्यवरांच्या हस्ते करण्यात आले.

कार्यक्रमादरम्यान प्रा. महेंद्र खेडकर यांनी फाउंडेशनच्या कार्याची माहिती देताना सांगितले की, या संस्थेची नोंदणी भारत सरकारच्या मिनिस्ट्री ऑफ कॉर्पोरेट अफेअर्स अंतर्गत करण्यात आली असून विविध सामाजिक व शैक्षणिक उपक्रम राबविण्याचा संकल्प आहे. तसेच अखिल भारतीय भोई समाज कल्याणकारी मंचचे कार्यही याच नोंदणीअंतर्गत चालणार असल्याचे त्यांनी स्पष्ट केले. यावेळी शिक्षण व रोजगाराशी संबंधित विविध शासकीय योजनांवरही सविस्तर चर्चा करण्यात आली.

या प्रसंगी फाउंडेशनचे कायदेशीर सल्लागार ॲड. मुश्ताख हुसेनी शाएद प्रमुख उपस्थित होते. तसेच प्रा. महेंद्र खेडकर, माजी नगरसेवक सुपडू खेडकर, आर. डी. मोरे, मंगा दादा साठे, राजू साठे, रामालाल साठे, पंडित वाडीले, अशोक शिवदे, साठे सर, वाघ सर, खंडेलवाल सर, कृष्णा खेडकर, चुणीलाल खेडकर, सुनील साठे यांच्यासह अनेक सामाजिक कार्यकर्ते व मान्यवर मोठ्या संख्येने उपस्थित होते.

या उपक्रमामुळे भोई समाजातील विवाह जुळवणी प्रक्रियेला गती मिळणार असून समाजात एक सकारात्मक उपक्रम म्हणून या प्रकाशनाचे स्वागत करण्यात येत आहे.