शहादा, दि. 20 (प्रतिनिधी)
शहरातील नामांकित ‘चावरा इंग्लिश स्कूल’विरोधात करण्यात आलेल्या गंभीर तक्रारींची दखल घेत शिक्षण विभागाने सखोल चौकशीचे आदेश दिले आहेत. ‘अखिल भारतीय ग्राहक पंचायत’कडून करण्यात आलेल्या तक्रारींमध्ये विद्यार्थ्यांचा मानसिक छळ, नियमबाह्य फी आकारणी तसेच आर्थिक गैरप्रकारांचे आरोप करण्यात आल्याने शैक्षणिक क्षेत्रात खळबळ उडाली आहे.
तक्रारीनुसार, शाळेत विद्यार्थ्यांना शालेय साहित्य व गणवेश विशिष्ट दुकानातूनच खरेदी करण्याची सक्ती केली जात आहे. तसेच व्यवहार रोखीने करून पावती न देण्याचा आरोपही करण्यात आला आहे. सांस्कृतिक कार्यक्रमांच्या नावाखाली सक्तीने वसुली केली जात असल्याचेही नमूद करण्यात आले आहे. पैसे न भरल्यास विद्यार्थ्यांचे अंतर्गत गुण कमी करण्याची धमकी दिली जात असल्याचा गंभीर आरोपही तक्रारीत आहे.
या संदर्भात शहादा तालुका अध्यक्ष अनिल भामरे यांनी पालकमंत्री हसन मुश्रीफ यांच्याकडे निवेदन सादर करून चौकशीची मागणी केली होती. त्यानंतर नंदुरबार जिल्हा परिषद शिक्षण विभागाने या प्रकरणाची गंभीर दखल घेत गटशिक्षण अधिकाऱ्यांना वस्तुनिष्ठ तपास करण्याचे आदेश दिले आहेत.
शिक्षणाधिकाऱ्यांनी स्पष्ट निर्देश देत २१ एप्रिल २०२६ पर्यंत चौकशी अहवाल सादर करण्याचे आदेश दिले असून, यानंतर कोणतेही स्मरणपत्र दिले जाणार नाही, असेही नमूद करण्यात आले आहे.
दरम्यान, या प्रकरणात दोषी आढळल्यास संबंधितांवर कठोर कारवाई करण्यात येईल, असा इशारा प्रभारी शिक्षणाधिकारी वंदना वळवी यांनी दिला आहे.
या चौकशी अहवालाकडे आता पालक, विद्यार्थी आणि नागरिकांचे लक्ष लागले असून, सत्य काय समोर येते याबाबत उत्सुकता निर्माण झाली आहे.
