बीड जिल्हा (प्रतिनिधी)
मंथन जनरल नॉलेज स्पर्धा परीक्षेत धानोरा (ता. आष्टी) येथील जिल्हा परिषद शाळेची विद्यार्थिनी कु. आर्या प्रवीण काळे हिने उल्लेखनीय यश संपादन करत बीड जिल्ह्यात प्रथम तर राज्यस्तरावर द्वितीय क्रमांक पटकावला आहे. तिच्या या यशामुळे शाळेच्या शिरपेचात पुन्हा एकदा मानाचा तुरा रोवला गेला आहे.
विद्यार्थ्यांमध्ये स्पर्धात्मक वृत्ती वाढावी आणि सर्वांगीण विकास व्हावा या उद्देशाने आयोजित करण्यात आलेल्या या परीक्षेचा नुकताच निकाल जाहीर झाला. यात आर्या काळे हिने उज्ज्वल कामगिरी करत जिल्ह्यात अव्वल स्थान पटकावले.
याचबरोबर शाळेतील इतर विद्यार्थ्यांनीही विविध स्तरांवर यश मिळवले आहे. प्रांजल गोरक्षनाथ आडागळे (तालुका स्तर द्वितीय), असलबा असलम सय्यद (तालुका स्तर चौथा), रुद्र केशव उदावंत (केंद्र स्तर प्रथम), गीतांजली संदेश शेळके (केंद्र द्वितीय), शिवराज राहुल शेळके (केंद्र प्रथम), रणवीत राजेंद्र गव्हाणे (केंद्र द्वितीय), अथर्व पंढरीनाथ गायकवाड (केंद्र तृतीय), अनन्या महेश लोहार (केंद्र प्रथम), संस्कार दत्तू लगड (केंद्र द्वितीय), विश्वजीत दासू शेलार (केंद्र द्वितीय) आणि राजवीर कपिलदेव गोस्वामी (केंद्र तृतीय) यांनीही यश मिळवले.
आर्या काळे हिने दुसऱ्यांदा अशी मानाची कामगिरी करत शाळेचा नावलौकिक वाढवला आहे. तिचा आणि तिचे वडील प्रवीण काळे यांचा शाळेच्या वतीने सत्कार करण्यात आला.
या सर्व विद्यार्थ्यांना शाळेतील शिक्षक-शिक्षिकांचे मोलाचे मार्गदर्शन लाभले. या यशाबद्दल गटशिक्षणाधिकारी, शिक्षण विस्तार अधिकारी, केंद्रप्रमुख, मुख्याध्यापक, शिक्षकवृंद, शालेय व्यवस्थापन समिती, पालक तसेच सामाजिक व शैक्षणिक क्षेत्रातील मान्यवरांकडून विद्यार्थ्यांचे अभिनंदन करून शुभेच्छांचा वर्षाव करण्यात येत आहे.
