आजरा (प्रतिनिधी) : आजरा शहरात महागाव रोड परिसरात सकाळी घडलेल्या भीषण दुर्घटनेत घराची भिंत कोसळून शिक्षिका व विद्यार्थिनीचा दुर्दैवी मृत्यू झाला असून एक महिला गंभीर जखमी झाली आहे. या घटनेने संपूर्ण परिसरात हळहळ व्यक्त होत आहे.
मिळालेल्या माहितीनुसार, सी. डी. फार्म परिसरातील डॉ. अनिल माधवराव देशपांडे यांच्या जुन्या घराची भिंत जेसीबीच्या साहाय्याने पाडण्याचे काम सुरू होते. सकाळी सुमारे १० वाजण्याच्या सुमारास कोणतीही सुरक्षिततेची खबरदारी न घेता सुरू असलेल्या कामादरम्यान भिंत अचानक रस्त्याच्या दिशेने कोसळली. त्याच वेळी रस्त्यावरून जाणाऱ्या नागरिकांवर ढिगारा कोसळून ही दुर्घटना घडली.
या घटनेत प्रा. ज्योती नितीन कुंभार (वय ४२) आणि कु. वैष्णवी तुकाराम भोसले (वय १४) यांचा जागीच मृत्यू झाला. तर श्रीमती ललिता तुकाराम भोसले (वय ४५) या गंभीर जखमी असून त्यांच्यावर रुग्णालयात उपचार सुरू आहेत.
घटनेची माहिती मिळताच नगराध्यक्ष अशोक चराटी, तहसीलदार समीर माने, नायब तहसीलदार विकास कोलते तसेच पोलीस व आरोग्य प्रशासनाने घटनास्थळी धाव घेत बचावकार्य केले. जखमींना तातडीने आजरा ग्रामीण रुग्णालयात हलवण्यात आले, मात्र डॉक्टरांनी दोघांना मृत घोषित केले.
दरम्यान, या प्रकरणी कंत्राटदार अभिजीत बाबूराव हुक्केरी, सब-कंत्राटदार विनोद पांडुरंग मोहिते आणि जेसीबी चालक मिथुन चव्हाण यांच्याविरोधात निष्काळजीपणाचा गुन्हा दाखल करण्यात आला आहे. सुरक्षिततेच्या नियमांकडे दुर्लक्ष केल्यामुळे हा अपघात घडल्याचा आरोप करण्यात आला आहे.
पोलिस निरीक्षक युवराज धोंडे यांच्या मार्गदर्शनाखाली आजरा पोलीस पुढील तपास करत असून, या घटनेमुळे परिसरात संताप व शोक व्यक्त केला जात आहे.
