जालना (दि. २० एप्रिल २०२६) :
जालना मर्चंट को-ऑपरेटिव्ह बँकेत झालेल्या तब्बल २३ कोटी ३३ लाख रुपयांच्या मोठ्या आर्थिक फसवणूक प्रकरणात आर्थिक गुन्हे शाखेने महत्त्वपूर्ण कारवाई करत आणखी तीन आरोपींना अटक केली आहे.
रामेश्वर विलासराव जाधव, ज्ञानेश्वर विलासराव जाधव (दोघे रा. भोकरदन) आणि सुधाकर रावसाहेब ठोंबरे (रा. जालना) अशी अटक करण्यात आलेल्या आरोपींची नावे आहेत. न्यायालयाने त्यांना ६ दिवसांची पोलीस कोठडी (PCR) सुनावली आहे.
बनावट कागदपत्रांद्वारे मोठा घोटाळा
या प्रकरणात वेअर हाऊसच्या नावावर १७७ बनावट खातेदार तयार करून बँकेची फसवणूक केल्याचे उघड झाले आहे. या प्रकरणी चंदनझीरा पोलीस ठाण्यात गुन्हा क्रमांक 220/2026 अंतर्गत BNS 2023 च्या विविध कलमांनुसार गुन्हा दाखल करण्यात आला आहे.
आधीच दोन मुख्य सूत्रधार अटकेत
तपासादरम्यान मुख्य सूत्रधार रायचंद सखाराम कुरंगळ आणि निलेश्वर शेषराव भोसले (सिंदखेड राजा, बुलढाणा) यांना यापूर्वीच अटक करण्यात आली आहे. त्यांना २४ एप्रिल २०२६ पर्यंत पोलीस कोठडी मिळालेली आहे.
एजंट नेटवर्कचाही सहभाग उघड
तपासात असेही निष्पन्न झाले आहे की, काही एजंटांनी बनावट कागदपत्रे तयार करणे, लायसन्स काढणे आणि मार्केट कमिटी पावत्या बनवणे यासारखी कामे करून खातेदारांना १० ते २० हजार रुपयांचे आमिष दाखवले होते. या नेटवर्कमधील काही आरोपी अद्याप फरार असून त्यांचा शोध सुरू आहे.
तपास आर्थिक गुन्हे शाखेकडे
या प्रकरणाचा तपास पोलीस अधीक्षक अजयकुमार बन्सल आणि अप्पर पोलीस अधीक्षक आयुष नोपाणी यांच्या मार्गदर्शनाखाली आर्थिक गुन्हे शाखेकडून सुरू आहे. अधिक आरोपी निष्पन्न होण्याची शक्यता वर्तवली जात आहे.
या कारवाईत सहा. पोलीस निरीक्षक मिथुन घुगे, पोलीस उपनिरीक्षक शैलेश म्हस्के व इतर पथकाने महत्त्वाची भूमिका बजावली.
