जामखेड (प्रतिनिधी) :
शिवसेना नेत्या ॲड. विद्याताई मोटे यांना विधान परिषदेवर संधी द्यावी, या मागणीसाठी अहिल्यानगर जिल्ह्यातील धनगर समाज बांधवांच्या वतीने पुण्यश्लोक अहिल्यादेवी होळकर यांच्या जन्मगाव चौंडी येथे दुग्ध अभिषेक करून अभिनव आंदोलन करण्यात आले.
पुण्यश्लोक अहिल्यादेवी होळकर यांच्या ३०१ व्या जयंतीचे औचित्य साधत सोमवारी (दि. २० एप्रिल २०२६) हा कार्यक्रम पार पडला. यावेळी अहिल्यादेवींच्या प्रतिमेस दुग्ध अभिषेक करून विद्याताई मोटे यांना विधान परिषदेवर संधी मिळावी, अशी ठाम मागणी उपस्थित समाजबांधवांनी केली.
या वेळी महाराजा यशवंतराव होळकर राज्याभिषेक सोहळा समितीचे सदस्य पांडुरंग माने यांनी सांगितले की, “विद्याताई मोटे यांनी सामाजिक क्षेत्रात केलेले कार्य उल्लेखनीय आहे. धनगर समाजाच्या प्रश्नांसाठी त्यांनी सातत्याने काम केले असून त्यांना संधी मिळावी ही समाजाची भावना आहे.”
समाजाच्या वतीने उपमुख्यमंत्री एकनाथ शिंदे यांना ही मागणी करण्यात आली असून, विद्याताई मोटे यांना उमेदवारी दिल्यास धनगर समाजाकडून त्यांचा भव्य सन्मान करण्यात येईल, असेही यावेळी सांगण्यात आले.
दरम्यान, विद्याताई मोटे यांचे नाव संभाव्य विधानपरिषद उमेदवारांच्या यादीत चर्चेत असल्याचेही यावेळी नमूद करण्यात आले. त्यांच्या सामाजिक कार्यामुळे आणि संघटन कौशल्यामुळे त्या शिवसेनेतील प्रभावी महिला चेहरा म्हणून ओळखल्या जात असल्याचे समाजबांधवांनी स्पष्ट केले.
या कार्यक्रमास अहिल्यानगर जिल्ह्यातील धनगर समाज बांधव मोठ्या संख्येने उपस्थित होते.
