नवी मुंबई (प्रतिनिधी) :
अक्षय तृतीयेच्या शुभमुहूर्तावर अक्कलकोट येथून आलेल्या श्री स्वामी समर्थ महाराजांच्या पादुकांचे पूजन व दर्शन सोहळा खारघर येथील सेलिब्रेशन सोसायटीमध्ये भक्तिमय वातावरणात संपन्न झाला.
या कार्यक्रमाचे आयोजन श्री दीपक यांच्या पुढाकाराने करण्यात आले होते. सोसायटीतील फ्लॅटधारकांच्या उपस्थितीत पादुका पूजन, दर्शन व तीर्थप्रसाद वितरणाचा कार्यक्रम पार पडला.
कार्यक्रमात आबालवृद्ध, महिला व नागरिक मोठ्या संख्येने सहभागी झाले होते. “जय जय स्वामी समर्थ” या जयघोषाने संपूर्ण परिसर दुमदुमून गेला आणि भक्तिमय वातावरण निर्माण झाले.
गेल्या वर्षाच्या तुलनेत यंदा भाविकांची उपस्थिती लक्षणीय वाढल्याचे आयोजकांनी सांगितले. यावेळी भाविकांनी दर्शन, पूजन आणि तीर्थप्रसादाचा लाभ घेतला.
कार्यक्रमाच्या शेवटी संध्याकाळी ५ वाजता श्री स्वामी समर्थ यांच्या पादुका पालखी पुढील नियोजित ठिकाणी मार्गस्थ झाली.
पुढील वर्षी सेक्टर १७ मधील सर्व रहिवाशांसाठी अधिक व्यापक स्वरूपात हा कार्यक्रम आयोजित करण्याची इच्छा आयोजक दीपक यांनी व्यक्त केली.
