कन्नड (प्रतिनिधी) :
कन्नड तालुक्यातील मुंडवाडी येथे शुक्रवारी पहाटे बिबट्याने गायीवर हल्ला करून तिचा फडशा पाडल्याची घटना घडली. या घटनेमुळे परिसरातील शेतकऱ्यांमध्ये भीतीचे वातावरण निर्माण झाले आहे.
मिळालेल्या माहितीनुसार, येथील पोलीस पाटील श्री दांडगे यांच्या गट क्रमांक २६४ मधील शेतात जनावरे बांधलेली होती. शुक्रवारी सकाळी सुमारे ५ वाजण्याच्या दरम्यान दबा धरून बसलेल्या बिबट्याने अचानक गायीवर हल्ला चढवून तिचा फडशा पाडला.
घटनेची माहिती मिळताच दांडगे यांनी वनविभागाच्या अधिकाऱ्यांना कळविले. अधिकारी तातडीने घटनास्थळी दाखल झाले व पंचनामा करण्यात आला. पंचनाम्यावेळी जामडी येथील भिला राठोड उपस्थित होते.
या भागात बिबट्याचा नेहमीच वावर असल्याची माहिती स्थानिक शेतकऱ्यांनी वनविभागाला दिली असून, अशा घटना वारंवार घडत असल्याने नागरिकांमध्ये भीतीचे वातावरण आहे. त्यामुळे प्रशासनाने तात्काळ दखल घेऊन योग्य उपाययोजना कराव्यात, अशी मागणी ग्रामस्थांकडून करण्यात येत आहे.
