कन्नड (प्रतिनिधी) :
कन्नड तालुक्यातील अंधानेर ते श्यामवाडी दरम्यानचा रस्ता अतिक्रमण करून बंद करण्यात आल्याच्या निषेधार्थ बापू महादू निकम आणि त्यांच्या कुटुंबीयांनी आमरण उपोषण सुरू केले आहे. रस्ता मोकळा करून देण्याच्या मागणीसाठी ते मौजे रेल येथील गट क्रमांक १३४ मध्ये उपोषणाला बसले आहेत.
या संदर्भात कन्नड येथील तहसीलदार न्यायालयात अर्ज दाखल करण्यात आला होता. त्यावर पाहणी पंचनामा करून संबंधित रस्ता मोकळा करण्याचे आदेश देण्यात आले होते. तसेच या आदेशाविरोधात छत्रपती संभाजीनगर येथील अप्पर जिल्हाधिकारी व अप्पर विभागीय आयुक्तांकडे दाखल करण्यात आलेले अपील देखील फेटाळण्यात आले असून, रस्ता मोकळा करण्याचा आदेश कायम ठेवण्यात आला आहे.
तथापि, संबंधितांकडून अद्यापही रस्ता खुला करण्यात आलेला नसल्याने अखेर निकम कुटुंबीयांनी आमरण उपोषणाचा मार्ग स्वीकारला आहे. या उपोषणात कुटुंबातील महिला सदस्यांचाही सहभाग असून, प्रशासनाने तात्काळ हस्तक्षेप करून रस्ता मोकळा करून द्यावा, अशी मागणी करण्यात येत आहे.
या प्रकरणाकडे स्थानिक प्रशासन कोणती भूमिका घेते, याकडे परिसरातील नागरिकांचे लक्ष लागले आहे.
