शहादा, दि. २१ (प्रतिनिधी) – अनुसूचित जातीच्या आरक्षणाचे उपवर्गीकरण करण्याच्या हालचालींविरोधात शहादा येथे आंबेडकरी अनुयायांनी तीव्र भूमिका घेत एल्गार पुकारला. केंद्र व राज्य सरकार घटनादत्त आरक्षण संपविण्याचे षडयंत्र रचत असल्याचा गंभीर आरोप यावेळी करण्यात आला.
मंगळवारी सायंकाळी महात्मा फुले स्मारक येथे विविध पक्ष, सामाजिक संस्था आणि आंबेडकरी चळवळीतील पदाधिकारी व कार्यकर्त्यांची महत्त्वपूर्ण बैठक पार पडली. या बैठकीत उपवर्गीकरणाच्या विरोधात तीव्र भावना व्यक्त करण्यात आल्या. तसेच ‘आरक्षण जनजागृती समिती’च्या माध्यमातून शासनाला लेखी निवेदन देण्याचा निर्णय घेण्यात आला.
बैठकीत वक्त्यांनी आरक्षणाच्या ऐतिहासिक व घटनात्मक पार्श्वभूमीवर प्रकाश टाकताना महात्मा ज्योतिराव फुले आणि छत्रपती शाहू महाराज यांनी आरक्षणाची पायाभरणी केली, तर डॉ. बाबासाहेब आंबेडकर यांनी त्याला संविधानिक दर्जा दिला, असे नमूद केले. आरक्षण हे केवळ गरिबी निर्मूलनासाठी नसून प्रतिनिधित्व सुनिश्चित करण्याचे प्रभावी साधन असल्याचेही मत व्यक्त करण्यात आले.
भारतीय संविधानातील कलम ३३०, ३३२, १६(४) आणि ३३५ अंतर्गत अनुसूचित जातींना एकत्रित आरक्षणाची तरतूद आहे. मात्र, सर्वोच्च न्यायालय यांच्या १ ऑगस्ट २०२४ च्या निकालानंतर राज्यांना उपवर्गीकरणाचे अधिकार मिळाल्याने या प्रक्रियेबाबत चिंता व्यक्त करण्यात आली. हे उपवर्गीकरण संविधानिक नसून केवळ वैधानिक स्वरूपाचे असून भविष्यात आरक्षणाच्या मूळ संकल्पनेलाच धक्का बसू शकतो, अशी भीती व्यक्त करण्यात आली.
२०११ च्या जनगणनेचा दाखला देत उपवर्गीकरणामुळे अनुसूचित जातींच्या १३ टक्के आरक्षणावर परिणाम होऊन विविध उपजातींमध्ये स्पर्धा वाढेल, तसेच संधींचे विभाजन होऊन सामाजिक प्रगती खुंटण्याची शक्यता व्यक्त करण्यात आली.
दरम्यान, राज्य सरकारने स्थापन केलेल्या माजी न्यायाधीश अनंत मनोहर बदर समितीचा अहवाल सार्वजनिक न करता हरकती मागविल्याबद्दल बैठकीत तीव्र नाराजी व्यक्त करण्यात आली. अहवालात चुकीची आकडेवारी असण्याची शक्यता असल्याने तो तातडीने जनतेसमोर सादर करावा, अशी मागणी करण्यात आली.
या बैठकीस अनिल कुवर, प्रा. देवेंद्र निकम, भरत नगराळे, संजय खंदारे, सुरेंद्र कुवर, प्रशांत निकुंभ, राजेंद्र गुलाले, किरण मोहिते, नरेंद्र महिरे, अॅड. दिनेश महिरे, चंद्रकांत रायसिंग, डॉ. गौतम कुवर, विष्णू जोंधळे, संजय निकुंबे, छोटू कुवर, शांतीलाल महिरे, नरेंद्र कुवर, प्रा. नेत्रदीपक कुवर यांच्यासह आंबेडकरी चळवळीतील अनेक कार्यकर्ते उपस्थित होते.
