माणगाव (जि. रायगड) :
रायगड जिल्ह्यातील माणगाव तालुक्यातील लोणेरे परिसरात एका लॉजमध्ये तरुणीचा संशयास्पद मृत्यू झाल्याची धक्कादायक घटना उघडकीस आली असून, या प्रकारामुळे परिसरात खळबळ उडाली आहे. प्राथमिक माहितीनुसार, एका तरुणाने संबंधित तरुणीला ओमकार रेसिडेन्सी लॉज येथे नेले होते. काही वेळानंतर खोलीचे दार आतून बंद करून तिच्यावर जीवघेणा हल्ला करण्यात आल्याचा संशय व्यक्त केला जात आहे, ज्यात तिचा मृत्यू झाला.
घटनेची माहिती मिळताच पोलिसांनी तात्काळ घटनास्थळी धाव घेत पंचनामा केला. मृतदेह पुढील तपासणीसाठी रुग्णालयात पाठवण्यात आला असून, मृत तरुणी लोणेरे परिसरातील रहिवासी असल्याची प्राथमिक माहिती समोर आली आहे.
दरम्यान, तरुणीला लॉजमध्ये घेऊन आलेला संशयित तरुण घटनेनंतर फरार झाला असून, पोलिसांनी त्याच्या शोधासाठी विशेष पथक नियुक्त केले आहे. परिसरातील सीसीटीव्ही फुटेज तपासले जात असून लॉजमधील कर्मचारी व प्रत्यक्षदर्शींचे जबाब नोंदवण्याचे काम सुरू आहे.
या घटनेमागील नेमके कारण अद्याप स्पष्ट झाले नसून, प्रेमसंबंधातील वाद की इतर काही कारण, याचा तपास सुरू आहे. आरोपीला लवकरात लवकर अटक करून प्रकरणाचा छडा लावण्यात येईल, असा विश्वास पोलिस प्रशासनाने व्यक्त केला आहे.
