जत (प्रतिनिधी) – तालुक्यातील बाज परिसरात विजांच्या कडकडाटासह झालेल्या पावसात एका तरुणाचा दुर्दैवी मृत्यू झाल्याची घटना घडली असून, या घटनेमुळे संपूर्ण परिसरात शोककळा पसरली आहे.
मिळालेल्या माहितीनुसार, अयाज फिरोज मुजावर (रा. बाज) हे आपल्या दोन सहकाऱ्यांसह कंठी येथून मोटरसायकलवरून प्रवास करत होते. दरम्यान, अचानक हवामानात बदल होऊन वादळी वाऱ्यासह जोरदार पाऊस आणि विजांचा कडकडाट सुरू झाला. प्रवासादरम्यानच अयाज यांच्या अंगावर वीज कोसळल्याने त्यांचा जागीच मृत्यू झाला.
या भीषण घटनेत अयाज यांच्यासोबत असलेले अन्य दोघे सहकारी गंभीर जखमी झाले असून, स्थानिक नागरिकांच्या मदतीने त्यांना तातडीने जवळच्या रुग्णालयात दाखल करण्यात आले आहे. सध्या त्यांच्यावर उपचार सुरू असल्याची माहिती मिळाली आहे.
अयाज मुजावर हे परिसरात मनमिळाऊ स्वभावाचे म्हणून ओळखले जात होते. त्यांच्या अचानक निधनामुळे बाज गावासह परिसरात हळहळ व्यक्त केली जात आहे. घटनेची माहिती मिळताच प्रशासकीय अधिकाऱ्यांनी घटनास्थळी धाव घेऊन पंचनामा केला असून पुढील कार्यवाही सुरू आहे.
दरम्यान, हवामानातील बदल लक्षात घेता वादळी पाऊस व विजांचा कडकडाट सुरू असताना नागरिकांनी उघड्यावर किंवा झाडाखाली थांबू नये, तसेच सुरक्षित ठिकाणी आश्रय घ्यावा, असे आवाहन प्रशासनाकडून करण्यात आले आहे.
