पिंपरी पेंढार (दुरगुडे पट नं.१) : गावातील श्री चारंगबाबा यात्रा उत्सव दि. २१ एप्रिल २०२६ रोजी मोठ्या उत्साहात आणि भक्तिमय वातावरणात संपन्न झाला. सकाळपासूनच विविध धार्मिक व सांस्कृतिक कार्यक्रमांचे आयोजन करण्यात आले होते.
उत्सवाची सुरुवात मांडवडाळ्याच्या मिरवणुकीने झाली. ही मिरवणूक गावातून मळ्यापर्यंत काढण्यात आली असून ग्रामस्थ व पाहुणे मोठ्या संख्येने सहभागी झाले होते. त्यानंतर देवाचा अभिषेक करण्यात आला. दुपारनंतर शेरणांच्या मिरवणुकीला सुरुवात झाली आणि पुढे शेरणांचा निलाव करण्यात आला.
यावेळी २०२५ या वर्षातील गुणवंत विद्यार्थ्यांचा सत्कार करण्यात आला. त्यानंतर महाप्रसादाचे आयोजन करण्यात आले होते. या कार्यक्रमालाही ग्रामस्थ व भाविकांनी मोठ्या संख्येने उपस्थित राहून सहभाग नोंदवला.
सायंकाळी काठी व छबिना मिरवणूक काढण्यात आली तसेच शोभेचे दारूकाम करण्यात आले. मनोरंजनासाठी ‘शुक्राची चांदणी’ ऑर्केस्ट्राचे आयोजन करण्यात आले होते, ज्याचा उपस्थितांनी आनंद लुटला.
कार्यक्रमाच्या यशस्वी आयोजनाबद्दल चारंगबाबा मंडळाचे अध्यक्ष प्रमोद नबाजी दुरगुडे तसेच यात्रा कमिटीचे अध्यक्ष प्रणेश संपत कुटे यांनी ग्रामस्थ व उपस्थितांचे आभार मानले.
