मुंबई : समाजातील ज्येष्ठ नागरिकांना आधार देण्याच्या उद्देशाने वांगणी येथील जिव्हाळा वृद्धाश्रमासाठी निधी संकलनार्थ ‘कोकणी अवलिया’ या विशेष संगीत मैफलीचे भव्य आयोजन करण्यात आले आहे. हा कार्यक्रम शुक्रवार, २२ मे २०२६ रोजी सायंकाळी ८.३० वाजता महाकवी कालिदास नाट्यमंदिर येथे संपन्न होणार आहे.
या कार्यक्रमाचे मुख्य आकर्षण सुप्रसिद्ध गायक सुनिल वाडकर यांची विशेष उपस्थिती असून, त्यांच्या आवाजात सादर होणारी बॉलिवूडमधील ५० गाण्यांची संगम मैफल रसिकांना सुरेल आनंद देणार आहे. त्यांच्या ५० व्या वाढदिवसानिमित्त हा कार्यक्रम अधिक विशेष स्वरूपात साजरा केला जाणार आहे.
कार्यक्रमाचे संगीत संयोजन राहुल जाधव (इंडियन आयडल फेम) यांच्या मार्गदर्शनाखाली होणार असून, सूत्रसंचालन श्रेया भ. करणार आहेत. तसेच त्यांच्या सादरीकरणामुळे कार्यक्रमाला वेगळा आयाम लाभणार आहे. या उपक्रमाचे आयोजन रफिज फॅन क्लब मुंबई आणि कोकण युवा सेवा संस्था यांच्या संयुक्त विद्यमाने करण्यात आले आहे.
या सांगीतिक मैफलीतून उभारला जाणारा निधी जिव्हाळा वृद्धाश्रमातील ज्येष्ठ नागरिकांच्या निवास, आहार, औषधोपचार व दैनंदिन गरजांसाठी वापरण्यात येणार आहे. सध्या येथे अनेक वृद्ध नागरिक वास्तव्यास असून त्यांच्या देखभालीसाठी सातत्याने आर्थिक मदतीची आवश्यकता भासत आहे.
कार्यक्रमासाठी ऑनलाईन तिकीट बुकिंगची सुविधा BookMyShow वर उपलब्ध आहे. तसेच डोनर पासेस, ग्रुप बुकिंग, प्रायोजकत्व व जाहिरातींसाठीही सुविधा उपलब्ध करून देण्यात आल्या आहेत.
समाजातील दानशूर व्यक्ती, संस्था आणि नागरिकांनी या उपक्रमात सहभागी होऊन ज्येष्ठांच्या सेवेसाठी हातभार लावावा, असे आवाहन आयोजकांनी केले आहे. “जिव्हाळा वृद्धाश्रम — माणुसकी जपण्याचा एक छोटासा प्रयत्न… चला, सर्वांनी मिळून सहकार्य करूया!” असेही आवाहन करण्यात आले आहे.
