एरंडोल (प्रतिनिधी) : शहरात बनावट कारवाईचा बनाव करून चहा विक्रेत्याकडून ₹१० हजारांची खंडणी उकळल्याची धक्कादायक घटना उघडकीस आली आहे. या प्रकरणामुळे परिसरात खळबळ उडाली असून, नागरिकांमध्ये भीतीचे वातावरण निर्माण झाले आहे.
मिळालेल्या माहितीनुसार, गजानन माधवराव महाजन (वय ४१, रा. माळीवाडा) हे धुळे-जळगाव चौपदरी महामार्गालगत हिमालय पेट्रोल पंपाजवळ चहा व थंडपेय विक्रीचा व्यवसाय करतात. दि. २० एप्रिल रोजी दुपारी सुमारे १.३० वाजता पांढऱ्या रंगाच्या कारमधून आलेल्या पाच जणांनी स्वतःला अन्न भेसळ विभागाचे अधिकारी असल्याचे सांगत तपासणी सुरू केली. किशोर हिम्मतराव बाविस्कर असे नाव सांगणाऱ्या व्यक्तीने गुटखा विक्रीचा आरोप करत कारवाईची धमकी दिली.
तपासणीदरम्यान काहीही आढळून न आल्यावर संबंधितांनी स्वतः आणलेला गुटखा दुकानात सापडल्याचा बनाव केल्याचा आरोप आहे. यानंतर “गुन्हा दाखल करू” अशी धमकी देत प्रकरण मिटवण्यासाठी ₹१० हजारांची मागणी करण्यात आली. उपस्थित नगरसेवक मयूर महाजन, रुपेश महाजन व अतुल मराठे यांच्या समक्ष महाजन यांनी उसनवार पैसे घेऊन आरोपींना रक्कम दिल्याचे फिर्यादीत नमूद आहे. पैसे घेतल्यानंतर आरोपी घटनास्थळावरून पसार झाले.
दरम्यान, या प्रकरणी गुन्हा नोंदवण्यासाठी आमदार अमोल पाटील स्वतः एरंडोल पोलीस ठाण्यात दाखल झाले. मात्र गुन्हा नोंदवण्यास विलंब होत असल्याने त्यांना तब्बल चार तास पोलीस ठाण्यात थांबावे लागले. यावर संतप्त प्रतिक्रिया देताना त्यांनी, “जर लोकप्रतिनिधीलाच इतका वेळ थांबावे लागत असेल, तर सामान्य नागरिकांची काय अवस्था होत असेल?” असा सवाल उपस्थित केला.
सदर प्रकरण गुन्हा शाखेकडे वर्ग करण्यात आले असून पुढील तपास सुरू आहे. बनावट अधिकाऱ्यांच्या नावाखाली सुरू असलेल्या अशा प्रकारांवर तातडीने आळा घालावा, अशी मागणी नागरिकांकडून जोर धरत आहे.
