दर्यापूर (प्रतिनिधी) : तालुक्यातील तहसील कार्यालयातील महसूल कर्मचारी व अधिकारी विविध प्रलंबित मागण्यांसाठी बेमुदत संपावर गेल्याने प्रशासनाचे कामकाज पूर्णपणे ठप्प झाले आहे. या संपाचा मोठा फटका सर्वसामान्य नागरिकांना बसत असून, आवश्यक कामे खोळंबल्याने नागरिकांना अडचणींचा सामना करावा लागत आहे.
राज्य सरकारी कर्मचारी मध्यवर्ती संघटनेच्या वतीने २१ एप्रिल २०२६ पासून पुकारलेल्या राज्यव्यापी आंदोलनात दर्यापूर तसेच अमरावती जिल्ह्यातील महसूल कर्मचारी मोठ्या संख्येने सहभागी झाले आहेत. जुनी पेन्शन योजना लागू करणे, रिक्त पदे तातडीने भरणे, वेतनवाढ करणे तसेच वाढलेला कामाचा ताण कमी करणे या प्रमुख मागण्यांसाठी हा संप पुकारण्यात आला आहे.
या संपामुळे तहसील कार्यालयातील सर्व कामकाजावर परिणाम झाला आहे. जात, उत्पन्न, अधिवास (डोमिसाईल) यांसारखी महत्त्वाची प्रमाणपत्रे मिळणे बंद झाले आहे. तसेच ७/१२ उतारे, फेरफार नोंदी आणि जमिनीशी संबंधित सर्व व्यवहार ठप्प झाले आहेत. विविध शासकीय योजनांसाठी लागणारी कागदपत्रे वेळेत मिळत नसल्याने विद्यार्थी, शेतकरी आणि इतर लाभार्थी अडचणीत सापडले आहेत.
दरम्यान, तहसील कार्यालयाबाहेर कर्मचाऱ्यांनी निदर्शने करत आपल्या मागण्या मान्य होईपर्यंत आंदोलन सुरू ठेवण्याचा इशारा दिला आहे. त्यामुळे येत्या काही दिवसांत प्रशासन आणि संघटनांमध्ये तोडगा न निघाल्यास नागरिकांच्या अडचणी आणखी वाढण्याची शक्यता व्यक्त केली जात आहे.
