मळद (ता. दौंड) : महाराष्ट्र शासनाच्या कृषी विभाग आणि बँक ऑफ महाराष्ट्र ग्रामीण विकास केंद्र (भिगवण) यांच्या संयुक्त विद्यमाने मळद येथे खरीप हंगाम २०२६-२७ पूर्वतयारीसाठी शेतकरी मार्गदर्शन बैठकीचे आयोजन करण्यात आले. तालुका कृषी अधिकारी अजिंक्य दुधाने आणि मंडळ कृषी अधिकारी दिनेश फडतरे यांच्या मार्गदर्शनाखाली पार पडलेल्या या बैठकीला शेतकऱ्यांचा उत्स्फूर्त प्रतिसाद मिळाला.
कार्यक्रमात उपकृषी अधिकारी हनुमंत बोडके यांनी खरीप हंगामातील पिकांचे नियोजन, दर्जेदार बी-बियाण्यांची निवड, तसेच शास्त्रोक्त खत व्यवस्थापन याबाबत सविस्तर मार्गदर्शन केले. पिकांवरील संभाव्य कीड व रोग नियंत्रणासाठी आवश्यक उपाययोजनांची माहिती देत त्यांनी शेतकऱ्यांना आधुनिक शेती तंत्रज्ञानाचा अवलंब करण्याचे आवाहन केले.
यावेळी बँक ऑफ महाराष्ट्रचे प्रतिनिधी उमेष निकम यांनी ‘बँक आपल्या दारी’ या उपक्रमाची माहिती देत महिला बचत गट आणि गटशेतीचे महत्त्व अधोरेखित केले. शेतीसोबत आर्थिक नियोजनाची जोड दिल्यास शेतकऱ्यांची प्रगती अधिक वेगाने होऊ शकते, असे त्यांनी नमूद केले.
या बैठकीचे अध्यक्षपद प्रगतशील शेतकरी चंद्रकांत दुधे यांनी भूषविले. कार्यक्रमाला अमित लडकत, रवींद्र शेलार, बापू नवले, बाळू सोनवणे यांच्यासह महिला शेतकरी व ग्रामस्थ मोठ्या संख्येने उपस्थित होते. सहाय्यक कृषी अधिकारी अझहरुद्दीन सय्यद आणि देविदास फलफले यांनी कार्यक्रमाचे यशस्वी आयोजन केले.
या मार्गदर्शन बैठकीमुळे आगामी खरीप हंगामासाठी योग्य दिशा मिळाल्याची भावना उपस्थित शेतकऱ्यांनी व्यक्त केली.
