जळगाव, दि. १८ (प्रतिनिधी) : जळगाव क्रिकेट लीग (JCL) स्पर्धेचे शानदार उद्घाटन शनिवारी संध्याकाळी उत्साहात पार पडले. या कार्यक्रमाला राज्याचे जलसंपदा मंत्री गिरीश महाजन, माजी मंत्री सुरेशदादा जैन, जैन इरिगेशनचे अध्यक्ष अशोक जैन यांच्यासह अनेक मान्यवरांची उपस्थिती लाभली. आमदार सुरेश भोळे, मंगेश चव्हाण, चंद्रकांत सोनवणे, किशोर पाटील, महापौर दीपमाला काळे, उपमहापौर मनोज चौधरी, संचालक अतुल जैन तसेच इतर मान्यवर मोठ्या संख्येने उपस्थित होते.
कार्यक्रमादरम्यान विविध संघांच्या मालकांचा सत्कार करण्यात आला. जळगाव कोगटा किंग्जचे अतुल कोगटा, जामनेर सातपुडा हिरोजचे किरण बच्छाव, चाळीसगाव चॅलेंजर्सचे संजय भावसार, रावेर रॉयल्सचे महावीर जैन, अमळनेर सुहांस जायंट्सचे संदीप काबरा आणि पाचोरा एसकेटी योद्धाजचे हेमंत कोठारी यांना मान्यवरांच्या हस्ते गौरविण्यात आले.
प्रास्ताविकात अतुल जैन यांनी २०१९ मध्ये झालेल्या JCL मधून अनेक खेळाडूंनी राज्य व राष्ट्रीय पातळीवर आपली छाप पाडल्याची माहिती दिली. ग्रामीण भागातील खेळाडूंना उत्तम सुविधा उपलब्ध करून देण्यासाठी जैन ड्रीम स्पेसेसच्या क्रीडांगणावर आधुनिक पायाभूत सुविधा उभारण्यात आल्याचे त्यांनी सांगितले. यावेळी स्पेक्ट्रमच्या अलरीक इलेक्ट्रिक्सच्या नवीन दालनालाही मान्यवरांनी भेट देत विविध उत्पादने लाँच केली.
यावेळी माजी मंत्री सुरेशदादा जैन यांनी आपल्या क्रिकेटमधील आठवणींना उजाळा दिला. “मी इंदूर येथे असताना रणजी संघात निवड झाली होती. विद्यापीठ स्तरावर अनेक सामने खेळलो. आता जळगावात अशोकभाऊ आणि अतुलभाऊ यांनी ग्रामीण खेळाडूंना उत्तम संधी उपलब्ध करून दिली आहे,” असे ते म्हणाले.
तर मंत्री गिरीश महाजन यांनी मैदानाच्या गुणवत्तेचे कौतुक करत “हे मैदान वानखेडे स्टेडियमपेक्षाही सरस आहे. यामुळे जळगावातून उत्कृष्ट खेळाडू घडतील,” असा विश्वास व्यक्त केला. त्यांनी आपल्या शालेय जीवनातील कुस्ती आणि कबड्डीतील सहभागाचाही उल्लेख केला.
कार्यक्रमाच्या शेवटी जळगाव क्रिकेट लीगच्या अंतिम सामन्यातील विजेत्याला दिल्या जाणाऱ्या ट्रॉफीचे अनावरण करण्यात आले. यानंतर रंगारंग सांस्कृतिक कार्यक्रम आणि फटाक्यांची आतषबाजी करण्यात आली. संपूर्ण वातावरणात उत्साहाचे आणि क्रीडामय आनंदाचे रंग भरले होते.
