आजरा (प्रतिनिधी) : येथील ‘लोकशाहीर द. ना. गव्हाणकर पुरस्कार’ वितरण सोहळा शनिवार, २ मे २०२६ रोजी उत्साहात पार पडणार असून, हा मानाचा पुरस्कार यंदा ख्यातनाम लोकशाहीर संभाजी भगत यांना प्रदान करण्यात येणार आहे. हा पुरस्कार डॉ. भालचंद्र कांगो यांच्या हस्ते दिला जाणार असून, राज्याचे वैद्यकीय शिक्षण मंत्री हसन मुश्रीफ यांची प्रमुख उपस्थिती लाभणार आहे. ही माहिती पुरस्कार व स्मारक समितीचे कार्याध्यक्ष कॉ. संपत देसाई यांनी पत्रकार परिषदेत दिली.
अलीकडेच पार पडलेल्या ‘लोकशाहीर द. ना. गव्हाणकर पुरस्कार समिती’च्या बैठकीत यंदाच्या पुरस्कारार्थींची निवड करण्यात आली. श्रमिकांच्या प्रश्नांवर आपल्या शाहिरीतून प्रभावी आवाज उठवणाऱ्या संभाजी भगत यांच्या कार्याचा गौरव या पुरस्काराद्वारे केला जाणार आहे.
डॉ. भालचंद्र कांगो हे भारतीय कम्युनिस्ट पक्ष चे केंद्रीय नेते असून महाराष्ट्रासह मध्यप्रदेश, उत्तरप्रदेश आणि हरियाणा या राज्यांची जबाबदारी त्यांच्या खांद्यावर आहे. विद्यार्थी जीवनापासूनच डाव्या चळवळीत सक्रिय असलेल्या डॉ. कांगो यांनी आपले आयुष्य कामगार, शेतकरी आणि कष्टकरी वर्गाच्या हक्कांसाठी समर्पित केले आहे. त्यामुळे त्यांच्या हस्ते हा पुरस्कार प्रदान होणे औचित्यपूर्ण मानले जात आहे.
दरम्यान, लोकशाहीर गव्हाणकर यांच्या स्मारक उभारणीसाठीही पाठपुरावा सुरू असल्याची माहिती देण्यात आली. दोन वर्षांपूर्वी झालेल्या कार्यक्रमात मंत्री हसन मुश्रीफ यांनी गव्हाणकर यांच्या गावी स्मारक उभारण्याचे आश्वासन दिले होते. त्या अनुषंगाने समितीने त्यांना या कार्यक्रमासाठी निमंत्रित केले आहे.
याच बैठकीत ‘लोकशाहीर द. ना. गव्हाणकर स्मृती पुरस्कार समिती’ची अधिकृत नोंदणी करण्याचा निर्णय घेण्यात आला. पत्रकार परिषदेला मुकुंददादा देसाई, सुधीरभाऊ देसाई, सुनील पाटील, डॉ. प्रा. नवनाथ शिंदे, मीना मंगळूरकर, युवराज पवार, संजय तर्डेकर, पुष्पलता घोळसे, कृष्णा सावंत, काशिनाथ मोरे, रोहित शेंडे, रवींद्र भाटले, संजय घाडगे, रणजित कालेकर, विक्रम देसाई, अमित सामंत यांच्यासह समितीचे अनेक सदस्य उपस्थित होते.
