पनवेल/कळंबोली (प्रतिनिधी) : कळंबोली येथील जिजामाता ओनर्स असोसिएशन के.एल.-१, सेक्टर-५ मधील श्री साईबाबा मंदिर चा ३० वा वर्धापन दिन सोहळा २० एप्रिल रोजी अत्यंत उत्साहात आणि भक्तिमय वातावरणात पार पडला. या निमित्त मंदिरात विविध धार्मिक व सामाजिक कार्यक्रमांचे आयोजन करण्यात आले होते.
सोहळ्याची सुरुवात पहाटे काकड आरतीने झाली. त्यानंतर यजमानांच्या हस्ते श्री साईबाबांच्या मूर्तीला मंगलस्नान व दुग्धाभिषेक करण्यात आला. पुढे होम-हवन करून कळंबोली परिसरातील नागरिकांना सुख, समृद्धी आणि उत्तम आरोग्य लाभावे, तसेच परिसरातील समस्या दूर व्हाव्यात, अशी प्रार्थना करण्यात आली.
यावेळी जिजामाता ओनर्स असोसिएशन आणि एम जी एम हॉस्पिटल यांच्या संयुक्त विद्यमाने मोफत आरोग्य शिबिराचे आयोजन करण्यात आले होते. या शिबिराचा शेकडो नागरिकांनी लाभ घेतला. दुपारी साईभक्तांसाठी भंडारा महाप्रसादाचे आयोजन करण्यात आले होते.
कार्यक्रमादरम्यान खारघर येथील भजनी मंडळांनी सादर केलेल्या भजनांनी वातावरण साईनामाच्या जयघोषाने दुमदुमून गेले. सायंकाळी वाजत-गाजत श्री साईबाबांची भव्य पालखी शोभायात्रा काढण्यात आली, ज्यामध्ये शेकडो भाविकांनी उत्स्फूर्त सहभाग नोंदविला.
या सोहळ्यास पनवेल महापालिकेच्या उपमहापौर प्रमिला पाटील, भाजपचे जिल्हा सरचिटणीस रविशेठ पाटील, नगरसेवक रामदास शेवाळे, अमर पाटील, युवानेते अमर ठाकूर, राष्ट्रवादी काँग्रेस (शरद पवार) चे जिल्हाध्यक्ष सतीश पाटील यांच्यासह विविध सामाजिक व राजकीय क्षेत्रातील मान्यवर उपस्थित होते.
या वर्धापन दिन सोहळ्याचे आयोजन जिजामाता ओनर्स असोसिएशन आणि श्री साई सेवा मंडळ यांच्या वतीने करण्यात आले होते.
