आजरा, प्रतिनिधी (दि. २२ एप्रिल):
महान तत्वज्ञ आणि थोर समाजसुधारक महात्मा बसवेश्वर यांची जयंती आजरा तालुक्यातील श्रीमंत गंगामाई वाचन मंदिर येथे अत्यंत उत्साहात साजरी करण्यात आली. या निमित्ताने आयोजित ग्रंथप्रदर्शन व जयंती सोहळ्याचे उद्घाटन चंद्रशेखर बटकडली व डॉ. शिवशंकर उपासे यांच्या हस्ते प्रतिमा पूजन करून करण्यात आले. कार्यक्रमाच्या अध्यक्षस्थानी वाचनालयाचे अध्यक्ष वामन सामंत होते.
कार्यक्रमाचे मुख्य आकर्षण म्हणजे ग्रंथ देणगीदार चंद्रशेखर बटकडली यांनी वाचनालयास दिलेली विशेष भेट. त्यांनी बसव व शरण साहित्याशी संबंधित तब्बल २०० पुस्तके वाचनालयाला प्रदान केली. या पुस्तकांचे प्रदर्शन २० ते २२ एप्रिल दरम्यान आयोजित करण्यात आले होते. या ग्रंथप्रदर्शनाला वाचनालयाचे सभासद, वाचक तसेच शालेय विद्यार्थ्यांनी मोठ्या उत्साहाने प्रतिसाद देत साहित्याचा लाभ घेतला.
यावेळी प्रमुख वक्ते डॉ. शिवशंकर उपासे यांनी आपल्या भाषणात महात्मा बसवेश्वरांच्या कार्याचा गौरव करताना सांगितले की, त्यांनी १२व्या शतकात ‘अनुभव मंटप’ स्थापन करून लोकशाही मूल्यांची पायाभरणी केली. समाजातील अन्यायकारक रूढी-परंपरांविरोधात त्यांनी ठाम भूमिका घेत समता, न्याय आणि बंधुतेचा संदेश दिला. त्यांच्या ‘वचन साहित्या’तून मांडलेले विचार आजही समाजाला दिशा देणारे ठरतात.
कार्यक्रमाचे स्वागत व प्रास्ताविक संचालक सुभाष विभुते यांनी केले, तर सूत्रसंचालन कार्यवाह कुंडलिक नावलकर यांनी केले.
या प्रसंगी उपाध्यक्षा विद्या हरेर, सहकार्यवाह रविंद्र हुक्केरी, संभाजीराव इंजल, विजय राजोपाध्ये, महंमदअली मुजावर, बंडोपंत चव्हाण, विनायक आमणगी, डॉ. अंजनी देशपांडे, गीता पोतदार, ग्रंथपाल चंद्रकांत कोंडुसकर यांच्यासह अनेक मान्यवर, विद्यार्थी व नागरिक मोठ्या संख्येने उपस्थित होते.
