आजरा, प्रतिनिधी:
जनता शिक्षण संस्था परिवारातील आजरा महाविद्यालयाच्या प्राध्यापिका प्रा. सौ. ज्योती नितीन कुंभार आणि आजरा हायस्कूलची गुणवंत विद्यार्थिनी कुमारी वैष्णवी तुकाराम भोसले यांचे सोमवार, दि. २० एप्रिल २०२६ रोजी अपघाती निधन झाल्याची दुर्दैवी घटना घडली. या घटनेमुळे संपूर्ण आजरा परिसरात तसेच शिक्षण क्षेत्रात हळहळ व्यक्त होत आहे. आजरा हायस्कूलतर्फे दोन्ही दिवंगत आत्म्यांना भावपूर्ण श्रद्धांजली अर्पण करण्यात आली.
या दुःखद प्रसंगानिमित्त आजरा हायस्कूलमध्ये शोकसभा आयोजित करण्यात आली होती. यावेळी जनता शिक्षण संस्थेचे प्रमुख मा. अशोक अण्णा चराटी यांनी दोन्ही दिवंगतांना श्रद्धांजली वाहत, एका कर्तव्यदक्ष प्राध्यापिका आणि एका होतकरू विद्यार्थिनीच्या अकाली जाण्याने संस्थेची मोठी हानी झाल्याची भावना व्यक्त केली.
या शोकसभेला संस्थेचे सर्व संचालक, सल्लागार, मुख्याध्यापक, उपमुख्याध्यापक, पर्यवेक्षक, शिक्षक व शिक्षकेतर कर्मचारी उपस्थित होते. आपल्या लाडक्या मैत्रिणीला आणि आदरणीय शिक्षिकेला अखेरचा निरोप देताना विद्यार्थ्यांचे डोळे पाणावले होते. संपूर्ण शाळा परिसरात शोकाकुल वातावरण पसरले होते.
प्रा. कुंभार आणि वैष्णवी भोसले यांच्या निधनामुळे त्यांच्या कुटुंबावर दुःखाचा डोंगर कोसळला असून, “या कठीण काळात संस्था पूर्णपणे कुटुंबियांच्या पाठीशी उभी आहे,” अशा भावना व्यक्त करण्यात आल्या.
यावेळी सर्व उपस्थितांनी मौन पाळून दिवंगत आत्म्यांना श्रद्धांजली अर्पण केली तसेच ईश्वर त्यांच्या आत्म्यास चिरशांती देवो आणि कुटुंबियांना या दुःखातून सावरण्याची शक्ती देवो, अशी प्रार्थना करण्यात आली.
