पनवेल/कळंबोली, दि. २३ — पनवेल महानगरपालिका क्षेत्रातील वाढती वाहतूक कोंडी आणि वायू प्रदूषण या गंभीर समस्यांवर तोडगा काढण्यासाठी “पॉड टॅक्सी” प्रकल्पाची अभिनव संकल्पना पुढे आली आहे. शिवसेनेच्या नगरसेविका सायली सरक यांनी हा प्रस्ताव मांडला असून, शहराच्या भविष्यातील वाहतूक व्यवस्थेसाठी तो महत्त्वाचा पर्याय ठरू शकतो, असे मत व्यक्त केले जात आहे.
खारघर, कामोठे, कळंबोली, नवीन पनवेल आणि पनवेल या भागांमध्ये वाहनांची संख्या झपाट्याने वाढत असल्याने वाहतूक कोंडी आणि प्रदूषणाचा प्रश्न अधिकच तीव्र झाला आहे. यावर शाश्वत आणि आधुनिक उपाय म्हणून पॉड टॅक्सी प्रणाली प्रभावी ठरू शकते, असे सायली सरक यांनी सांगितले.
या संदर्भात त्यांनी राज्याचे परिवहन मंत्री प्रताप सरनाईक यांची भेट घेऊन सविस्तर निवेदन सादर केले. या प्रकल्पाबाबत त्यांनी सकारात्मक भूमिका दर्शवून पनवेलमध्ये पॉड टॅक्सी सुरू करण्यास अनुकूलता दर्शवली असल्याची माहिती देण्यात आली.
तसेच, नगरसेविका सरक यांनी महापौर नितीन पाटील आणि महापालिका आयुक्त मंगेश चितळे यांनाही या प्रकल्पासंदर्भात निवेदन दिले आहे. शहरातील वाढती लोकसंख्या आणि वाहतुकीचा वाढता ताण लक्षात घेता, महापालिकेमार्फत लवकरच सर्वेक्षण करण्यात येणार असून, त्यानंतर पॉड टॅक्सी प्रकल्प राबविण्याबाबत निर्णय घेतला जाईल, असे प्रशासनाकडून संकेत देण्यात आले आहेत.
दरम्यान, या उपक्रमावेळी कळंबोली शिवसेना शहर प्रमुख तुकाराम सरक यांच्यासह श्रीकांत फाळके, महेश गोडसे, निलेश दिसले, प्रेम डांगे, प्रेम गोडसे, सुनील खताळ, अंकित सरगर आदी शिवसैनिक उपस्थित होते.
