पनवेल/कामोठे, दि. २३ — पनवेल महापालिकेच्या कामोठे प्रभाग समिती ‘क’ मार्फत मंगळवार आणि बुधवारी अनधिकृत अतिक्रमण व फेरीवाल्यांविरोधात व्यापक धडक कारवाई करण्यात आली. आयुक्त मंगेश चितळे यांच्या निर्देशानुसार राबविण्यात आलेल्या या मोहिमेत विविध ठिकाणांवरील अनधिकृत स्टॉल, नर्सरी, फेरीवाले आणि हातगाड्यांवर कारवाई करून मोठ्या प्रमाणात साहित्य जप्त करण्यात आले, तर काही ठिकाणी झोपड्याही हटविण्यात आल्या.
महापालिका कार्यक्षेत्रातील सर्व प्रभागांमध्ये अतिक्रमण हटविण्याच्या सूचना उपायुक्त नानासाहेब कामठे यांनी दिल्या होत्या. त्यानुसार कामोठे सेक्टर १९ मधील मारुती स्वीट व चेतक स्वीट परिसरात अनधिकृत स्टॉलवर कारवाई करत सिलेंडर, शेगडी आणि इतर साहित्य जप्त करण्यात आले. तसेच सेक्टर ७ येथील एमएनआर स्कूल चौकात अनधिकृत फळ विक्रेत्यांवर कारवाई करण्यात आली.
कामोठे पोलीस स्टेशनसमोरही फेरीवाल्यांवर कारवाई करत त्यांचे साहित्य जप्त करण्यात आले. याशिवाय सहाय्यक आयुक्त तथा प्रभाग अधिकारी डॉ. रूपाली माने आणि प्रभाग अधीक्षक दशरथ भंडारी यांच्या मार्गदर्शनाखाली बुधवारी सेक्टर १९, २५, अक्षर बिल्डिंग परिसर, खान्देश्वर स्टेशन, सेक्टर २१ आणि सेक्टर ३४ येथे अनधिकृत व विनापरवाना नर्सरींवर कारवाई करण्यात आली. संबंधित झोपड्या तोडण्यात आल्या.
खान्देश्वर स्टेशन परिसरातही अनधिकृत विक्रेत्यांवर कारवाई करून त्यांचे साहित्य जप्त करण्यात आले. सेक्टर २१ येथे दोन नर्सरींसह भंगार व सायकल विक्रेत्यांच्या झोपड्यांवर कारवाई करण्यात आली, तर सेक्टर ३४ येथे अनधिकृत हातगाड्या हटविण्यात आल्या. नीलकंठ स्वीट परिसरातही अनधिकृत नारळ विक्रेत्यावर कारवाई करण्यात आली.
महापालिकेने अनधिकृत व्यवसायांवर कठोर भूमिका घेतली असून यापुढेही अशा प्रकारच्या अतिक्रमणाविरोधात सातत्याने कारवाई सुरू ठेवण्यात येणार असल्याचे प्रशासनाकडून स्पष्ट करण्यात आले आहे.
