चंदगड (प्रतिनिधी):
कोल्हापूर जिल्हा परिषदेच्या नूतन मुख्य कार्यकारी अधिकारी डॉ. जास्मिन यांनी पदभार स्वीकारल्यानंतर चंदगड तालुक्याचा पहिला अधिकृत दौरा केला. यावेळी चंदगडचे आमदार राजेश पाटील यांनी त्यांची भेट घेऊन पुष्पगुच्छ देत स्वागत केले व पुढील कार्यासाठी शुभेच्छा दिल्या. या सदिच्छा भेटीदरम्यान तालुक्यातील विविध प्रलंबित प्रश्नांवर सविस्तर चर्चा करण्यात आली.
आमदार राजेश पाटील यांनी तालुक्यातील रिक्त शासकीय पदांमुळे कामकाजावर होणारा परिणाम, शाळांच्या इमारतींची दुरवस्था व शैक्षणिक सुविधांची कमतरता, ग्रामीण भागातील आरोग्य केंद्रांची अवस्था तसेच औषध पुरवठ्याच्या अडचणी यांसारख्या महत्त्वाच्या मुद्द्यांकडे लक्ष वेधले. याशिवाय ‘जल जीवन मिशन’ योजनेच्या अंमलबजावणीत येणारे तांत्रिक व प्रशासकीय अडथळेही त्यांनी मांडले.
या सर्व समस्यांवर तातडीने उपाययोजना करून दुर्गम भागातील नागरिकांना शासकीय योजनांचा लाभ मिळवून देण्यासाठी प्रशासनाने अधिक गतिमान व्हावे, अशी मागणी आमदार पाटील यांनी केली. यावर डॉ. जास्मिन यांनी सकारात्मक प्रतिसाद देत तालुक्यातील प्रश्नांचा सखोल आढावा घेऊन आवश्यक ती कार्यवाही करण्याचे आश्वासन दिले.
या प्रसंगी जिल्हा परिषद व पंचायत समितीचे सभापती, उपसभापती, विविध विभागांचे अधिकारी तसेच आजी-माजी सदस्य मोठ्या संख्येने उपस्थित होते.
