अंबाजोगाई (प्रतिनिधी) – अंबाजोगाई येथील उपप्रादेशिक परिवहन (आरटीओ) कार्यालयाच्या विस्तारीकरणासाठी राज्य शासनाने १४ कोटी ९९ लाख ७५ हजार ४०६ रुपयांच्या निधीस प्रशासकीय व वित्तीय मान्यता दिली असून, या दुसऱ्या टप्प्यामुळे कार्यालयाच्या विकासाला गती मिळणार आहे. पहिल्या टप्प्यातील इमारत बांधकाम पूर्ण होऊन सध्या त्या ठिकाणी नियमित कामकाज सुरू असताना, आता नव्या मंजुरीमुळे पुढील विस्ताराचा मार्ग मोकळा झाला आहे.
केज विधानसभा मतदारसंघाच्या आमदार नमिता मुंदडा यांनी या प्रकल्पासाठी सातत्याने केलेल्या पाठपुराव्यामुळे हा निधी मंजूर झाल्याचे सांगितले जात आहे. माजी आरोग्यमंत्री स्वर्गीय विमलताई मुंदडा यांनी अंबाजोगाई येथे उपप्रादेशिक परिवहन कार्यालय मंजूर करून आणल्याने अंबाजोगाईसह आसपासच्या सहा तालुक्यांतील वाहनधारकांची मोठी सोय झाली होती. सुरुवातीला भाड्याच्या जागेत सुरू असलेले हे कार्यालय आता स्वतःच्या सुसज्ज इमारतीत स्थलांतरित झाले आहे.
नव्या मंजुरीनुसार, इमारतीचा स्टिल्ट फ्लोअर आणि पहिल्या मजल्याचे बांधकाम करण्यात येणार असून, त्यामध्ये फर्निचर, पाणीपुरवठा, मलनिस्सारण, विद्युतीकरण तसेच सौर ऊर्जा यंत्रणा बसवण्याचा समावेश आहे. यासोबतच सुरक्षिततेसाठी संरक्षक भिंत, अंतर्गत सिमेंट काँक्रीट रस्ते, वाहनतळ शेड आणि मुख्य प्रवेशद्वारासाठी पुलाचे बांधकाम करण्यात येणार आहे. दिव्यांगांसाठी रॅम्प व लिफ्ट सुविधा तसेच पर्यावरणपूरक उपाय म्हणून रेन वॉटर हार्वेस्टिंग आणि सोलर रूफटॉप यंत्रणाही उभारण्यात येणार आहे.
दरम्यान, हा निधी उपलब्ध करून दिल्याबद्दल आमदार नमिता मुंदडा यांनी मुख्यमंत्री देवेंद्र फडणवीस, उपमुख्यमंत्री सुनेत्राताई पवार, उपमुख्यमंत्री एकनाथ शिंदे, परिवहन मंत्री प्रताप सरनाईक आणि मंत्री पंकजाताई मुंडे यांचे आभार व्यक्त केले आहेत.
