अंबाजोगाई (प्रतिनिधी) – भारतीय जनता पक्षाच्या महाराष्ट्र प्रदेश कार्यकारिणीची घोषणा करताना प्रदेशाध्यक्ष रवींद्र चव्हाण यांनी राम कुलकर्णी यांची राज्य प्रवक्तेपदी पुन्हा फेरनियुक्ती जाहीर केली आहे. या निर्णयाचे विविध स्तरांतून स्वागत होत असून बीड जिल्ह्यात आनंदाचे वातावरण निर्माण झाले आहे.
पक्ष संघटन अधिक बळकट करण्याच्या उद्देशाने नव्या कार्यकारिणीत अनुभवी नेत्यांना संधी देण्यात आली असून, राम कुलकर्णी यांचा त्यात समावेश करण्यात आला आहे. मागील काही वर्षांत त्यांनी पक्षाची भूमिका प्रभावीपणे मांडत माध्यमांमध्ये आपली वेगळी ओळख निर्माण केली आहे. विशेषतः संजय राऊत यांच्या विधानांना ठोस प्रत्युत्तर देत त्यांनी चर्चेत स्थान मिळवले होते.
२०१९ पासून राज्य प्रवक्ते म्हणून काम पाहत असलेल्या कुलकर्णी यांनी देवेंद्र फडणवीस, पंकजा मुंडे आणि इतर वरिष्ठ नेत्यांच्या नेतृत्वाखाली संघटनात्मक कार्यात सक्रिय भूमिका बजावली आहे. बीड जिल्ह्यात ते पंकजाताई मुंडे यांचे विश्वासू कार्यकर्ते म्हणून ओळखले जातात. पत्रकारिता, समाजकारण आणि राजकारण या क्षेत्रांमध्ये तब्बल ३३ वर्षांचा त्यांचा अनुभव असून, स्पष्टवक्तेपणा आणि परखड भूमिका ही त्यांची ओळख आहे.
स्वर्गीय गोपीनाथ मुंडे यांचे पट्टशिष्य म्हणूनही त्यांची ओळख असून, त्यांच्या सहवासात त्यांनी दीर्घकाळ काम केले आहे. सध्या ते मध्यप्रदेशातील प्रशिक्षण कार्यशाळेत सहभागी असताना त्यांना फेरनियुक्तीची माहिती मिळाली.
आपल्या पुनर्नियुक्तीबद्दल बोलताना राम कुलकर्णी यांनी पक्ष नेतृत्वाने दाखवलेल्या विश्वासाबद्दल आभार व्यक्त केले असून, “सेवाभाव आणि निष्ठेने पक्षाची भूमिका जनतेपर्यंत पोहोचविण्याचे काम पुढेही सुरू ठेवू,” असा विश्वास व्यक्त केला आहे. त्यांच्या निवडीचे पक्षातील पदाधिकारी, लोकप्रतिनिधी आणि कार्यकर्त्यांकडून अभिनंदन केले जात आहे.
