एरंडोल (प्रतिनिधी) – कठोर परिश्रम, जिद्द आणि चिकाटीच्या जोरावर कोणतीही अडचण पार करता येते, याचे जिवंत उदाहरण जळगाव जिल्ह्यातील योगेश महाजन यांनी घालून दिले आहे. अत्यंत साध्या शेतमजूर कुटुंबातून आलेल्या योगेश महाजन यांनी शिक्षणाच्या बळावर यशाचे शिखर गाठत ‘आदर्श शिक्षक पुरस्कार’ पटकावला आहे. त्यांच्या या यशामुळे परिसरात अभिमानाची भावना व्यक्त होत असून सर्वत्र त्यांच्यावर कौतुकाचा वर्षाव होत आहे.
योगेश महाजन यांचा जन्म गरीब कुटुंबात झाला. वडील शेतमजुरी करून संसार चालवत असताना अनेक आर्थिक अडचणींवर मात करत त्यांनी शिक्षण पूर्ण केले. शिक्षणाचे महत्त्व ओळखून त्यांनी स्वतःच्या प्रगतीसोबतच इतर विद्यार्थ्यांनाही घडवण्याचा संकल्प केला. सुरुवातीला लहान स्तरावर सुरू केलेले त्यांचे शैक्षणिक कार्य आज मोठ्या प्रमाणावर विस्तारले आहे.
त्यांच्या मार्गदर्शनाखाली ‘श्री क्लासेस’मधून शालेय व स्पर्धा परीक्षांचे मार्गदर्शन दिले जाते, ‘शीतल अकॅडमी’मधून ग्रामीण विद्यार्थ्यांचा इंग्रजीबाबतचा न्यूनगंड दूर केला जातो, तर ‘श्री नेक्स्टजेन कॉम्प्युटर्स’च्या माध्यमातून विद्यार्थ्यांना संगणक साक्षरतेचे प्रशिक्षण दिले जाते. त्यांच्या या उपक्रमांमुळे अनेक विद्यार्थ्यांना दिशा मिळत असून ते सक्षम होत आहेत.
त्यांच्या निस्वार्थ शैक्षणिक कार्याची दखल घेत त्यांना ‘आदर्श शिक्षक पुरस्कार’ देऊन सन्मानित करण्यात आले. “हा पुरस्कार माझ्या आई-वडिलांच्या कष्टांचा आणि विद्यार्थ्यांच्या विश्वासाचा आहे. ग्रामीण भागातील प्रत्येक विद्यार्थी सक्षम व्हावा, हेच माझे ध्येय आहे,” असे मनोगत योगेश महाजन यांनी व्यक्त केले.
आजच्या काळात अनेक तरुण अडचणींचा बाऊ करतात; मात्र योगेश महाजन यांनी प्रतिकूल परिस्थितीतही यश मिळवत एक आदर्श निर्माण केला आहे. त्यांच्या कार्यामुळे ते तरुणांसाठी प्रेरणास्थान ठरत असून, “जिद्द असेल तर अशक्य काहीच नाही,” हा संदेश त्यांनी आपल्या कृतीतून दिला आहे.
