लातूर | प्रतिनिधी
निट पेपरफुटी प्रकरणानंतर लातूरमधील उद्योग भवन परिसरातील ट्यूशन एरियाचा प्रश्न ऐरणीवर आला असून, या परिसराला स्पेशल एज्युकेशन झोन म्हणून मान्यता मिळवून देण्यासाठी पाठपुरावा करण्यात येणार असल्याची ग्वाही डॉ. अर्चनाताई पाटील चाकुरकर यांनी दिली. लातूर पॅटर्न बचाव कृती समितीच्या बैठकीत त्या बोलत होत्या.
लातूर येथील उद्योग भवन परिसरातील शिकवणी चालक, हॉस्टेल व्यावसायिक तसेच छोट्या-मोठ्या व्यवसायिकांना जिल्हा उद्योग केंद्राकडून आस्थापना बंद करण्याच्या नोटिसा बजावण्यात आल्याने परिसरातील व्यावसायिकांमध्ये चिंतेचे वातावरण निर्माण झाले आहे. या पार्श्वभूमीवर “लातूर पॅटर्न बचाव कृती समिती” स्थापन करण्यात आली आहे.
बैठकीत डॉ. अर्चनाताई पाटील चाकुरकर यांनी सांगितले की, शिक्षण क्षेत्रातील लातूर पॅटर्न घडवण्यात संस्थाचालकांसोबतच शिकवणी चालक व संबंधित व्यावसायिकांचाही मोठा वाटा आहे. या पॅटर्नमुळे लातूरच्या अर्थकारणालाही गती मिळाली आहे. काही व्यक्तींमुळे निट पेपरफुटी प्रकरणात लातूर पॅटर्न बदनाम करण्याचा प्रयत्न होत असला तरी त्याचा डाग संपूर्ण व्यवस्थेवर लागू देणार नाही, असेही त्यांनी स्पष्ट केले.
उद्योग भवन परिसर म्हणजेच लातूर इंडस्ट्रियल इस्टेट को-ऑपरेटिव्ह सोसायटी परिसराला पुन्हा वैभव मिळवून देण्यासाठी या भागाला स्पेशल एज्युकेशन झोन म्हणून मान्यता मिळणे आवश्यक असल्याचे त्यांनी नमूद केले. यासाठी टप्प्याटप्प्याने पाठपुरावा केला जाणार असून प्रथम जिल्हाधिकाऱ्यांची भेट घेऊन परिसरातील अडचणी व परिस्थिती मांडली जाईल. त्यानंतर उद्योगमंत्री आणि शेवटी मुख्यमंत्री यांची भेट घेऊन हा प्रस्ताव मंजूर करण्याची मागणी करण्यात येणार असल्याचे त्यांनी सांगितले.
या बैठकीला भाजप शहर जिल्हाध्यक्ष अजित पाटील कव्हेकर, भाजप सरचिटणीस प्रवीण कस्तुरे, नगरसेवक विनय जाकते, ऋषीकेश राजे, राजश्री धोत्रे, मिना गायकवाड, प्रविण सावंत, पुनीत पाटील, ओम धरणे आदी उपस्थित होते.
बैठकीपूर्वी डॉ. अर्चनाताई पाटील चाकुरकर यांनी परिसराची पाहणी करून व्यावसायिकांच्या अडचणी जाणून घेतल्या व आवश्यक उपाययोजनांबाबत चर्चा केली.
