पोलिस मुख्यालयात स्मोक हॅन्डग्रेनेडचा स्फोट; चार जवान जखमी
प्रतिनिधी
पोलिस मुख्यालयात सोमवारी सकाळी स्मोक हॅन्डग्रेनेडचा अचानक स्फोट झाल्याने चार पोलिस जवान जखमी झाल्याची घटना घडली. ही घटना २५ मे रोजी सकाळी सुमारे १० वाजण्याच्या सुमारास घडली असून, जखमी जवानांवर खासगी रुग्णालयात उपचार सुरू आहेत.
मिळालेल्या माहितीनुसार, पोलिस कर्मचाऱ्यांना हॅन्डग्रेनेड कसे हाताळावे याबाबत प्रात्यक्षिकासह प्रशिक्षण दिले जात होते. त्यावेळी एका जवानाच्या हातातच स्मोक हॅन्डग्रेनेडचा स्फोट झाला. या दुर्घटनेत दोन जवानांच्या हातांच्या बोटांना गंभीर दुखापत झाली असून इतर दोन कर्मचारी किरकोळ जखमी झाले आहेत.
घटनेची माहिती मिळताच वरिष्ठ पोलिस अधिकाऱ्यांनी घटनास्थळी धाव घेतली. सर्व जखमी जवानांना तातडीने जवळील खासगी रुग्णालयात दाखल करण्यात आले असून तज्ज्ञ डॉक्टरांच्या देखरेखीखाली त्यांच्यावर उपचार सुरू आहेत.
या संदर्भात राखीव पोलिस निरीक्षक Umesh Pardeshi यांनी माहिती देताना सांगितले की, “जमाव पांगवण्यासाठी वापरण्यात येणाऱ्या स्मोक हॅन्डग्रेनेडची पिन काढल्यानंतर संबंधित जवानाकडून लिव्हर सुटल्याने हा अपघाती स्फोट झाला.”
घटनेनंतर पोलिस मुख्यालय परिसरात काही काळ तणावाचे वातावरण निर्माण झाले होते. पोलिस प्रशासनाकडून पुढील चौकशी सुरू आहे.
