दहा दिवसांत चौथ्यांदा वाढ; पेट्रोल 111.75 तर डिझेल 98.25 रुपये प्रति लिटर
अहिल्यानगर | प्रतिनिधी
अहिल्यानगरमध्ये इंधन दरवाढीचा भडका उडाला असून, मागील दहा दिवसांत पेट्रोल आणि डिझेलच्या दरात तब्बल चार वेळा वाढ करण्यात आली आहे. २५ मे रोजी पुन्हा दरवाढ जाहीर करण्यात आल्याने नागरिकांच्या खिशाला मोठी झळ बसत आहे.
ताज्या दरवाढीनुसार पेट्रोलच्या दरात प्रति लिटर २.६१ रुपयांची तर डिझेलच्या दरात २.७१ रुपयांची वाढ झाली आहे. त्यामुळे अहिल्यानगरमध्ये पेट्रोलचा दर १११.७५ रुपये प्रति लिटर तर डिझेलचा दर ९८.२५ रुपये प्रति लिटरपर्यंत पोहोचला आहे.
मागील दहा दिवसांतील वाढीचा विचार करता पेट्रोलच्या दरात एकूण सुमारे ८ रुपयांची वाढ झाली आहे. यापूर्वी १५ मे रोजी पेट्रोलच्या दरात ३ रुपयांची वाढ करण्यात आली होती. त्यानंतर १९ मे रोजी प्रति लिटर ९० पैशांची वाढ झाली. २३ मे रोजी पेट्रोल ८७ पैसे तर डिझेल ९१ पैशांनी महागले होते. आता २५ मे रोजी पुन्हा मोठी वाढ झाल्याने वाहनधारकांमध्ये नाराजी व्यक्त होत आहे.
दरम्यान, पेट्रोल-डिझेलसोबतच सीएनजीच्या दरातही वाढ करण्यात आली आहे. २५ मेपासून अहिल्यानगरमध्ये सीएनजीचा दर १०१.८४ रुपये प्रति किलोवर पोहोचला आहे.
इंधन दरवाढीमुळे वाहतूक खर्च वाढण्याची शक्यता असून, त्याचा परिणाम जीवनावश्यक वस्तूंच्या किमतींवरही होण्याची भीती व्यक्त केली जात आहे.
