📍 दोडामार्ग | प्रतिनिधी
कुडासे-वानोशी नदी परिसरात सोमवारी सायंकाळी घडलेल्या दुर्दैवी घटनेत १३ वर्षीय वेदांत सचिन सांगेलकर याचा नदीत बुडून मृत्यू झाला. या घटनेमुळे परिसरात हळहळ व्यक्त होत असून सांगेलकर कुटुंबावर दुःखाचा डोंगर कोसळला आहे.
मिळालेल्या माहितीनुसार, वेदांत हा मूळ मुंबई येथील रहिवासी होता. उन्हाळी सुट्टीसाठी तो दोडामार्ग येथे आपल्या नातेवाईकांकडे आला होता. सायंकाळच्या सुमारास तो आपल्या भावासोबत नदीवर अंघोळीसाठी गेला असता पाण्याचा अंदाज न आल्याने तो खोल पाण्यात गेला.
घटनेची माहिती मिळताच स्थानिक ग्रामस्थांनी तातडीने शोधकार्य सुरू केले. काही वेळानंतर वेदांतला नदीबाहेर काढून साटेली-भेडशी प्राथमिक आरोग्य केंद्र येथे उपचारासाठी दाखल करण्यात आले. मात्र वैद्यकीय अधिकाऱ्यांनी त्याला मृत घोषित केले.
या दुर्दैवी घटनेनंतर संपूर्ण परिसरात शोककळा पसरली असून नागरिकांकडून हळहळ व्यक्त केली जात आहे.
