पनवेल | प्रतिनिधी
वाहनातील डिझेल संपल्याने कोणतीही पार्किंग लाईट अथवा इशारा न देता रस्त्यात उभ्या केलेल्या ट्रकला पाठीमागून रिक्षाची जोरदार धडक बसून झालेल्या भीषण अपघातात रिक्षाचालकाचा जागीच मृत्यू झाला. मंगळवारी रात्री जुना पुणे-बेंगळूर महामार्गावरील आजीवली ब्रिजजवळ, कोनगाव येथे पुणे लेनवर ही दुर्दैवी घटना घडली.
मोरेश्वर अनंता सोनावळे (रा. ठोंबरेवाडी, पोयंजे) असे मृत रिक्षाचालकाचे नाव असून, त्यांच्या निधनामुळे परिसरात हळहळ व्यक्त होत आहे. या प्रकरणी निष्काळजीपणे ट्रक रस्त्यात उभा करणाऱ्या चालकाविरोधात पनवेल तालुका पोलीस ठाण्यात गुन्हा दाखल करण्यात आला आहे.
पोलिसांकडून मिळालेल्या माहितीनुसार, संबंधित ट्रक चालकाच्या वाहनातील डिझेल अचानक संपल्याने त्याने ट्रक जुना पुणे-बेंगळूर महामार्गावरील आजीवली ब्रिजजवळ रस्त्याच्या मधोमध उभा केला होता. मात्र, रात्रीच्या वेळी मागून येणाऱ्या वाहनांना ट्रक दिसावा यासाठी आवश्यक असलेली पार्किंग लाईट, रिफ्लेक्टर किंवा कोणताही धोक्याचा इशारा देणारी व्यवस्था करण्यात आली नव्हती.
दरम्यान, रिक्षाचालक मोरेश्वर सोनावळे हे आपल्या रिक्षासह त्या मार्गावरून जात असताना अंधारामुळे त्यांना रस्त्यात उभ्या असलेल्या ट्रकचा अंदाज आला नाही. त्यामुळे त्यांची रिक्षा भरधाव वेगात ट्रकच्या मागील भागावर आदळली. धडक इतकी भीषण होती की, सोनावळे यांच्या डोक्याला आणि शरीराला गंभीर दुखापत झाली.
अपघातानंतर स्थानिक नागरिकांनी तातडीने मदतकार्य सुरू करत पोलिसांना माहिती दिली. पोलिसांनी घटनास्थळी धाव घेत जखमी रिक्षाचालकाला उपचारासाठी रुग्णालयात हलवले. मात्र, डॉक्टरांनी तपासणीअंती त्यांना मृत घोषित केले.
या घटनेनंतर पनवेल तालुका पोलिसांनी घटनास्थळी पंचनामा केला असून, रस्त्यावर धोकादायकरित्या वाहन उभे करून अपघातास कारणीभूत ठरल्याप्रकरणी अज्ञात ट्रक चालकाविरोधात गुन्हा दाखल करण्यात आला आहे. पुढील तपास पनवेल तालुका पोलीस करत आहेत.
या अपघातामुळे महामार्गावरील सुरक्षेचा प्रश्न पुन्हा ऐरणीवर आला असून, रात्रीच्या वेळी रस्त्यावर बेजबाबदारपणे वाहने उभी करणाऱ्यांवर कठोर कारवाई करण्याची मागणी नागरिकांकडून होत आहे.
