सेलू | प्रतिनिधी
सेलू शहरात गुरुवार दि. २८ मे २०२६ रोजी दुपारी सुमारे ३.३० वाजण्याच्या सुमारास अचानक आलेल्या अवकाळी पावसासह तुफानी वाऱ्यामुळे मोठ्या प्रमाणात नुकसान झाले. शहरातील अनेक भागांमध्ये झाडे उन्मळून पडली, तर छोट्या व्यावसायिकांच्या टपऱ्या आणि दुकाने उद्ध्वस्त झाल्याने नागरिकांमध्ये भीतीचे वातावरण निर्माण झाले आहे.
विशेषतः विकास चौक परिसरात तुफानी वाऱ्याचा मोठा फटका बसला. रस्त्यालगत उभारण्यात आलेल्या अनेक टपरी दुकानदारांचे पत्रे उडून गेले असून काही दुकाने पूर्णपणे कोसळल्याचे चित्र पाहायला मिळाले. अचानक आलेल्या या नैसर्गिक संकटामुळे लहान व्यावसायिकांचे मोठे आर्थिक नुकसान झाले आहे.
वादळी वाऱ्यामुळे अनेक ठिकाणी झाडांच्या फांद्या तुटून रस्त्यावर पडल्या. त्यामुळे काही काळ वाहतुकीलाही अडथळा निर्माण झाला होता. नागरिकांनी तत्काळ रस्त्यांवरील झाडे आणि फांद्या हटवण्यासाठी प्रशासनाकडे मागणी केली.
दरम्यान, विकास चौक परिसरात काही काळ वीजपुरवठा खंडित झाला होता. त्यामुळे नागरिकांना अंधाराचा आणि गैरसोयीचा सामना करावा लागला. वीज वितरण विभागाने तातडीने दुरुस्तीचे काम हाती घेत वीजपुरवठा सुरळीत करण्याचा प्रयत्न केला.
या अवकाळी पावसामुळे आणि तुफानी वाऱ्यामुळे व्यापारी तसेच सर्वसामान्य नागरिकांचे मोठे नुकसान झाले असून, प्रशासनाने तात्काळ पंचनामा करून नुकसानग्रस्तांना आर्थिक मदत द्यावी, अशी मागणी नागरिकांकडून करण्यात येत आहे.
तसेच शहरातील धोकादायक आणि जीर्ण झाडांची वेळेत छाटणी करावी, वादळी पावसाच्या पार्श्वभूमीवर आपत्कालीन यंत्रणा अधिक सतर्क ठेवावी आणि भविष्यात अशा दुर्घटना टाळण्यासाठी उपाययोजना कराव्यात, अशी मागणीही नागरिकांनी केली आहे.
