श्रीक्षेत्र माहूर | प्रतिनिधी
माहूर शहरात बकरी ईद मोठ्या उत्साहात, आनंदात आणि धार्मिक वातावरणात साजरी करण्यात आली. शहरातील ईदगाह, गौसीया मस्जिद, सोनापिर दरगाह, नगीना मस्जिद तसेच तानुशाह भानुशाह मस्जिद येथे सकाळी साडेआठ वाजण्याच्या सुमारास मुस्लिम बांधवांनी ईदची विशेष नमाज अदा केली.
नमाजानंतर ईदगाह परिसरात हिंदू-मुस्लिम बांधवांनी एकमेकांना गळाभेट देत ईदच्या शुभेच्छा दिल्या. यावेळी सामाजिक ऐक्य, बंधुभाव आणि सौहार्दाचे सुंदर दर्शन घडले.
नमाजपूर्वी इमाम साहेबांनी आपल्या प्रवचनातून इस्लाम धर्म हा अमन आणि शांतीचा संदेश देणारा धर्म असल्याचे सांगितले. देशात आणि जगात शांतता, सौहार्द आणि बंधुभाव कायम राहावा यासाठी विशेष प्रार्थना करण्यात आली. कोणाविषयीही मनात कटुता न ठेवता सर्वांप्रती प्रेमभावना ठेवण्याचा संदेशही त्यांनी दिला.
“प्रेम दिल्याने ते वाढते” या भावनेतून विविध धर्मीयांमध्ये ऐक्य आणि विश्वबंधुत्वाची भावना अधिक दृढ व्हावी, अशी अपेक्षाही यावेळी व्यक्त करण्यात आली.
या प्रसंगी नगराध्यक्ष फिरोज दोसानी, आनंद तुपदाळे, प्रशांत भाऊ राठोड यांचे प्रतिनिधी विजय भाऊ कांबळे यांच्यासह अनेक मान्यवर उपस्थित होते. उपस्थित मान्यवरांनी मुस्लिम बांधवांना ईदच्या शुभेच्छा देत सामाजिक सलोखा जपण्याचे आवाहन केले.
