छत्रपती संभाजीनगर | प्रतिनिधी
बकरी ईदच्या पार्श्वभूमीवर छत्रपती संभाजीनगर शहरात पोलीस आयुक्त प्रवीण पवार यांच्या मार्गदर्शनाखाली विशेष पथकाने मोठी कारवाई करत अवैध गोवंश वाहतूक व साठवणुकीवर धडक मोहीम राबवली.
या कारवाईत पोलिसांनी विविध ठिकाणी छापे टाकून सुमारे ६० लाख रुपयांपेक्षा अधिक किमतीचा गोवंश जप्त केला आहे. तसेच कत्तलीच्या उद्देशाने डांबून ठेवण्यात आलेल्या १३१ गोवंशांची सुरक्षित सुटका करण्यात आली असून त्यांना गोरक्षण समिती व गोशाळांमध्ये रवाना करण्यात आले आहे.
या प्रकरणी शहरातील विविध पोलीस ठाण्यांत ४ स्वतंत्र गुन्हे दाखल करण्यात आले असून एकूण ८ आरोपींना ताब्यात घेण्यात आले आहे.
पोलीस प्रशासनाने स्पष्ट केले आहे की, सणासुदीच्या पार्श्वभूमीवर कायदा व सुव्यवस्था अबाधित ठेवण्यासाठी शहरात कठोर कारवाई सुरूच राहणार आहे. नागरिकांनी अफवांवर विश्वास न ठेवता शांतता राखावी तसेच संशयास्पद हालचालींची माहिती तातडीने पोलिसांना द्यावी, असे आवाहनही करण्यात आले आहे.
