मोहरी खुर्द येथे महाआरोग्य शिबिरास उत्स्फूर्त प्रतिसाद

मोहरी प्रतिनिधी –

आज मोहरी खुर्द येथे अनुगामी लोकराज्य महाअभियान (अनुलोम) तसेच समर्थ युवा फाउंडेशन यांच्या संयुक्त विद्यमाने भव्य महाआरोग्य शिबिराचे आयोजन करण्यात आले होते. सकाळी १० वाजता मोहरी गावातील जिल्हा परिषद प्राथमिक शाळेच्या प्रांगणात या शिबिराचे उद्घाटन करण्यात आले.

या महाआरोग्य शिबिरास मोहरी खुर्द, मोहरी बुद्रुक तसेच तेलवडी येथील नागरिकांचा उत्स्फूर्त प्रतिसाद लाभला. शिबिरामध्ये नागरिकांची विविध आरोग्य तपासण्या करण्यात आल्या. यामध्ये रक्त तपासणी (CBC टेस्ट), रक्तातील साखर तपासणी, ब्लड शुगर, रक्तदाब (BP), कोलेस्ट्रॉल तपासणी तसेच महिलांसाठी स्तनाच्या कॅन्सरची तपासणी (मेमोग्राफी) आणि डोळ्यांची तपासणी करण्यात आली.

विशेष म्हणजे या शिबिरामध्ये ६३ रुग्णांना मोफत चष्म्यांचे वाटप करण्यात आले. सायंकाळी ६ वाजेपर्यंत एकूण १४२ नागरिकांची आरोग्य तपासणी करून त्यांचे तपासणी अहवाल नागरिकांना हस्तांतरित करण्यात आले.

या कार्यक्रमासाठी अनुलोमचे भागजनसेवक ॲड. मंगेश चंद्रशेखर अंबुले यांचे मोलाचे सहकार्य लाभले. तसेच मोहरी गावचे अनुलोम मित्र सागर पांगरकर, पोलीस पाटील गोरक्ष सुतार व अन्य ग्रामस्थ मंडळ तसेच कार्यकर्त्यांचे विशेष योगदान लाभले.