मंचर प्रतिनिधी –
जनगणना कर्तव्य बजावत असताना ऑन ड्युटी असलेल्या शिक्षिका श्रीमती दीपाली सुजित तांबे (रा. मंचर) यांचा दुर्दैवी अपघाती मृत्यू झाल्याची घटना घडली असून परिसरात हळहळ व्यक्त करण्यात येत आहे.
मिळालेल्या माहितीनुसार, श्रीमती तांबे या अहिरवडे येथील प्राथमिक शाळेत शिक्षिका म्हणून कार्यरत होत्या. जनगणनेच्या कामानिमित्त त्या कर्तव्य बजावत असताना एका भरधाव कंटेनरने त्यांना जोरदार धडक दिली. या भीषण अपघातात त्यांचा जागीच मृत्यू झाला.
घटना घडल्यानंतर परिसरातील नागरिकांनी मोठी गर्दी केली होती. या घटनेमुळे संपूर्ण परिसरात शोककळा पसरली असून शिक्षण क्षेत्रातही हळहळ व्यक्त करण्यात येत आहे.
स्वर्गीय दीपाली तांबे या उपक्रमशील, विद्यार्थ्यांमध्ये मिसळून काम करणाऱ्या आणि सामाजिक जाणीव असलेल्या शिक्षिका म्हणून परिचित होत्या. त्यांच्या अकाली निधनामुळे विद्यार्थ्यांसह शिक्षक वर्ग आणि नागरिकांमध्ये दुःखाचे वातावरण निर्माण झाले आहे.
घटनेनंतर विविध स्तरातून शोक व्यक्त करण्यात येत असून त्यांच्या कुटुंबियांवर दुःखाचा डोंगर कोसळला आहे.
