सामाजिक कार्यकर्ते सुनील भाऊ राठोड यांच्या नेतृत्वात महागाव पोलीस ठाण्यावर धडक मोर्चा
महागाव / प्रतिनिधी भगवान देवकर : महागाव तालुक्यातील आमणी बु. येथे सुरू असलेल्या अवैध दारू विक्रीविरोधात गावातील महिलांनी आक्रमक पवित्रा घेत महागाव पोलीस ठाण्यावर धडक मोर्चा काढला. सामाजिक कार्यकर्ते सुनील भाऊ राठोड यांच्या नेतृत्वाखाली शेकडो महिलांनी पोलीस प्रशासनाकडे कठोर कारवाईची मागणी केली.
गावात खुलेआम सुरू असलेल्या अवैध दारू विक्रीमुळे तरुण पिढी व्यसनाधीन होत असून अनेक कुटुंबे उद्ध्वस्त होत असल्याचा आरोप महिलांनी यावेळी केला. गावातील शांतता आणि सामाजिक वातावरण बिघडत असल्याने महिलांचा संयम सुटला असून त्यांनी संघर्षाचा मार्ग स्वीकारल्याचे आंदोलनादरम्यान स्पष्ट झाले.
महिलांच्या म्हणण्यानुसार, आमणी बु. परिसरात अनेक ठिकाणी बेकायदेशीर देशी दारूची विक्री सुरू असून त्यामुळे गावात भांडणे, कौटुंबिक वाद तसेच गुन्हेगारीच्या घटनांमध्ये वाढ होत आहे. युवक शिक्षणापासून दूर जात असल्याची खंतही महिलांनी व्यक्त केली.
मोर्चादरम्यान “दारूमाफियांना आळा घाला”, “गाव दारूमुक्त करा” अशा जोरदार घोषणांनी परिसर दणाणून गेला. महिलांच्या आक्रमक भूमिकेमुळे पोलीस प्रशासनही सतर्क झाले.
यावेळी महागाव पोलीस स्टेशनचे बीट जमादार धनराज निळे यांनी महिलांच्या निवेदनाची दखल घेत अवैध दारू विक्रेत्यांवर कारवाई करण्यात येईल, असे आश्वासन दिले. तसेच गावातील शांतता अबाधित राखण्यासाठी पोलिसांकडून विशेष लक्ष ठेवले जाईल, असेही त्यांनी स्पष्ट केले.
