मतदार याद्यांतील गैरप्रकारांवर लक्ष ठेवण्याचे शिवसैनिकांना आवाहन
पालम : शिवसेना पक्ष संघटना गावपातळीपर्यंत अधिक मजबूत करण्यासाठी कटिबद्ध असून, शिवसैनिकांच्या पाठीमागे भक्कमपणे उभा राहणार असल्याचा निर्धार शिवसेना जिल्हाप्रमुख विष्णुभाऊ मुरकुटे यांनी व्यक्त केला.
शहरातील लोहा रोडवरील शुक्लेश्वर हॉटेल येथे शिवसेना तालुकाप्रमुख बापूराव पौळ यांच्या वतीने जिल्हाप्रमुख विष्णुभाऊ मुरकुटे यांचा सत्कार करण्यात आला. यावेळी आयोजित बैठकीत बोलताना त्यांनी शिवसेना ही निष्ठावंत कार्यकर्त्यांची संघटना असून, पक्षाशी प्रामाणिक राहणाऱ्यांना नेहमीच न्याय मिळतो, असे ठामपणे सांगितले.
सध्या सुरू असलेल्या मतदार याद्या पुनरिक्षण मोहिमेचा उल्लेख करताना त्यांनी शिवसैनिकांना प्रत्येक गाव व प्रभागात बारकाईने लक्ष ठेवण्याचे आवाहन केले. मतदार याद्यांमध्ये दुबार, तिबार किंवा डुप्लिकेट नावांचा समावेश होऊ नये, यासाठी दक्ष राहण्याचे निर्देश त्यांनी दिले. सर्वसामान्यांच्या समस्या सोडविण्यासाठी शिवसेना प्राधान्याने काम करणार असल्याचेही त्यांनी स्पष्ट केले.
कार्यक्रमाचे सूत्रसंचालन सोनाजी ढगे यांनी केले, तर आभार प्रदर्शन तालुकाप्रमुख बापूराव पौळ यांनी मानले.
यावेळी उपजिल्हाप्रमुख बालासाहेब लोखंडे, माधवराव शेंडगे, तालुका संघटक एकनाथ मोहिते, सुरेंद्र ढेले, सखाराम राऊत, सुनील कौटकवार, सोनाजी ढगे, कैलास ढगे, बाबूराव शिनगारे, विलास शिनगारे, धनंजय दुधाटे, दामोदर पवार, हनुमंतराव कदम, सुग्रीव पौळ, नागनाथ गवते,राजु कुरे यांच्यासह मोठ्या संख्येने शिवसैनिक उपस्थित होते.
